"/>

निर्माण व्यवसायलाई मर्यादित बनाउन व्यवसायीको माग, व्यवसायीहरुलाई इजीपी सम्बन्धी तालिम आवश्यक

काठमाडौ । नेपाल निर्माण व्यवसायी महासंघको एक प्रतिनिधिमण्डलले व्यवसायीहरुले सामना गर्नु परेको समस्याका बारेमा सार्वजनिक खरिद अनुगमन कार्यालयका सचिव महेश्वर न्यौपानेलाई जानकारी गराएको छ ।

बुधवार राजधानीमा भएको छलफलका क्रममा व्यवसायीहरुले आफ्ना समस्या र समाधानका बारेमा सचिव न्यौपानेको ध्यानाकर्षण गराएका हुन् । महासंघ प्रतिनिधिमण्डलले हाल सार्वजनिक निर्माणका बोलपत्रहरुमा इजीपी लागू भएपनि अधिकांश निर्माण व्यवसायीहरुलाई इजीपी सम्बन्धी तालिम दिन नसक्दा उनीहरु बोलपत्रमा सहभागी हुन नसकेको जानकारी सचिव न्यौपानेलाई गराएको छ ।

इजीपी प्रक्रियामा प्राविधिक समस्याहरु पनि देखिएकोले दुई करोड सम्मको निर्माण कार्यको लागि बिना इजीपी हार्डकपि खरिद गर्न र बोलपत्र दाखिला गर्न पाउने व्यवस्था गरिदिन महासंघ प्रतिनिधिमण्डलले सचिव न्यौपाने समक्ष आग्रह गरेको छ ।

यसैबीच महासंघ प्रतिनिधिमण्डलले जिल्ला प्रशासन कार्यालय अन्तर्गत प्रमुख जिल्ला अधिकारीको अध्यक्षतामा बनेकोे जिल्ला दररेट निर्धारण समितिको बैठकलाई प्रभावकारी बनाउन अनुरोध गरेको छ । ढुङ्गा, माटो, बालुवा, गिटी, ईटा तथा डण्डी जस्ता निर्माण सामाग्रीहरुको अप्रत्यासित मूल्य बृद्धि भइरहेको वर्तमान अवस्थामा धेरै पटक प्रयास गर्दा पनि दररेट निर्धारण समितिको बैठक वस्न नसकेकोे जानकारी प्रतिनिधिमण्डलले गराएको छ ।

सार्वजनिक खरिद नियमावली २०६४ को नियम १ सय ४८ बमोजिम अहिले १० प्रतिशत भन्दा बढी मुल्य बृद्धि भएकोले जिल्ला दररेट निर्धारण समितिको बैठक यथाशिघ्र बोलाई व्यवासयीहरुलाई राहत दिनुपर्ने महासंघको माग रहेको छ ।

जवाफमा सचिव न्यौपानेले निर्माण व्यवसायलाई मर्यादित तथा व्यवस्थित बनाउन आफ्नो तर्फबाट सक्दो पहल गर्ने प्रतिबद्धता व्यक्त गरे । महासंघ अध्यक्ष विष्णुभाई श्रेष्ठ नेतृत्वको प्रतिनिधिमण्डलले सार्वजनिक खरिद ऐनको पहिलो संशोधन र सार्वजनिक खरिद नियमावलीको चौथौं संशोधनले सम्बोधन नगरेका र त्रुटिपूर्ण भएका संशोधन सहित अन्य कानुनी जटिलताको विषयमा समेत सचिव न्यौपानेसँग छलफल गरेको महासंघका प्रवक्ता विष्णु बुढाथोकीले जानकारी दिए ।

प्रतिनिधिमण्डलमा अध्यक्ष श्रेष्ठसँगै महासंघका माहासचिव राम शरण देउजा, प्रवक्ता विष्णु बुढाथोकी, निर्माण व्यवसायी गोकर्ण शाह , जनसम्पर्क अधिकृत रामचन्द्र गिरी लगायतको सहभागिता रहेको थियो । यसअघि पर्यटन तथा नागरिक उड््यन सचिव रहनु भएका न्यौपाने हालै सार्वजनिक खरिद अनुगमन कार्यालयमा सरुवा हुनु भएको हो ।

२०७४ माघ २४ गते प्रकाशित

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com