एकीकृत माओवादी निकट अखिल क्रान्तिकारी भारतको अघोषित नाकाबन्दी विरुद्धमा हस्ताक्षर कार्यक्रम गरेका छन्।
धरानको भानुचौक अघि हस्ताक्षर कार्यक्रम राखिएको थियो। हस्ताक्षरित १८ मिटर लामो कपडालाई पार्टीको केन्द्रीय कार्यालयमार्फत् भारतीय दुताबासलाई बुझाउने तयारी भएको जिल्ला सचिव प्रवेग लिम्बूले बताए।
सांकेतिक रुपमा भारतीय हस्तक्षेप विरुद्ध हस्ताक्षर कार्यक्रम गरिएको हो। दोस्रो चरणमा भने क्रियात्मक कार्यक्रम हुने उनले बताए। क्रियात्मक कार्यक्रम अन्तर्गत भारतीयद्धारा सञ्चालनमा आएका स्कुल तथा सवारी साधनको रोक लगाउने तयारी भएको छ।
मोदीको पुत्ला जलाइयो
एमालेको भातृ संगठनहरुले भारतीय प्रधानमन्त्री नरेन्द्र मोदीको पुत्ला दहन गरेका छन्। बुधबार युवा संघ नेपाल नगर र १ नम्बर क्षेत्रीय समितिको संयुक्त आयोजनामा मोदीको पुत्ला जलाइएको हो।
भारतको अघोषित नाकाबन्दी र तराईमा लामो समयदेखि भइरहेको बन्दको तिब्र विरोधमा एमालेको भातृ संगठन नेपाल यातायात स्वतन्त्र मजदुर संगठन, अनेम संघ, अनेरास्ववियुलगायत विरोधमा उत्रिएका हुन्।
उनीहरुले पार्टी कार्यालयबाट निकालेको जुलुस भानुचौकमा आएर कोणसभामा परिणत गरेका थिए। कोणसभापूर्व मोदीको पुत्ला दहन गरेका हुन्। कोणसभालाई मजदुर संगठनको तर्फबाट कोशी अञ्चल सचिव लक्ष्मी बानिया, अनेरास्ववियुकी केन्द्रीय सदस्य गीता राई, युवा संघका केन्द्रीय सदस्य ज्ञानदीप लिम्बूलगायतले बोलेका थिए।
वि.सं.२०७२ असोज १४ बिहीवार १७:३५ मा प्रकाशित
