काठमाण्डौं । १९ वर्षमुनिको विश्वकप क्रिकेटको क्वाटरफाइनलमा प्रवेश गरिसकेको नेपाल समूह चरणको अन्तिम खेलमा भने भारतसँग पराजित भएको छ ।
बंगलादेशको शेरे बंगला नेशनल स्टेडियममा ४८ ओभरमा घटाइएको खेलमा नेपाल ७ विकेटले पराजित भएको हो।
नेपालले दिएको १ सय ७० रनको लक्ष्य भारतले मात्र १८ ओभर १ बलमा मात्र ३ विकेट गुमाएर भेट्टाएको थियो। भारतको दुई विकेट प्रेम तामाङले लिएका हुन् भने अर्को विकेट सन्दिप लामिछानेले लिएका हुन्। टस हारेर पहिले ब्याटिङ गरेको नेपालले भारत सामु प्रतिष्पर्धात्मक स्कोर खडा गर्न सकेन। भारतको बलरहरु सामु नेपालका ब्याट्सम्यानहरु निरीह देखिए।
सुरुवातदेखि नै धर्मराएको नेपाली ब्याटिङ लाइनअप मध्यक्रममा समेत जम्न सकेन। तर पनि पूरै ४८ ओभर खेलेको नेपालले ८ विकेट गुमाएर मात्र १ सय ६९ रन जोड्न सक्यो।
माघ १८, २०७२/२.५
वि.सं.२०७२ माघ १८ सोमवार १४:०१ मा प्रकाशित