कञ्चनपुर । डिभिजन सहकारी कार्यालय महेन्द्रनगरले वार्षिक लेखा परीक्षण नगरी कारोबार सञ्चालन गर्ने जिल्लाका १० सहकारी संस्थाको दर्ता खारेजी गरेको छ ।
तीन वर्षदेखि लेखा परीक्षण प्रतिवेदन नबुझाउने र साधारणसभा नगर्ने सहकारी संस्थाको दर्ता खारेजी गरिएको हो । सहकारी डिभिजन कार्यालयका प्रमुख रामबहादुर खातीले लेखा परीक्षणका लागि पटक पटक आग्रह गर्दा पनि अटेर गर्ने, प्रगति प्रतिवेदन नबुझाउने, साधारणसभा नगर्ने र सम्बन्धित कागजात नबुझाउने सहकारीको दर्ता खारेजी गरिएको बताए ।
यहाँका ४२ वटा सहकारी संस्थालाई सहकारी डिभिजन कार्यालयले निष्क्रियको सूचीमा राखेको छ । निष्क्रिय अवस्थामा रहेका सहकारी संस्थाको स्थलगत अनुगमन गरी खारेजीका लागि प्रक्रिया अगाडि बढाइने खातीले बताए ।
सहकारी ऐन–२०४८, सहकारी नियमावली– २०४९ अनुसार लेखा परीक्षण नगर्ने सहकारीलाई कारबाही गरिने प्रावधान छ । यसैगरी, सहकारी दर्ता, अनुगमन तथा नियमन मापदण्ड–२०६८ मा मापदण्ड मिच्ने सहकारीलाई कारबाहीको दायरामा ल्याउने प्रावधान छ ।
मापदण्ड मिच्ने सहकारीलाई कानुनअनुसार कारबाही गरिएको हो । जिल्लामा हालसम्म ३९४ वटा सहकारी दर्ता भई कारोबार सञ्चालन गरिरहेका छन् ।
वि.सं.२०७२ चैत ४ बिहीवार १५:२७ मा प्रकाशित
