काठमाडौ । दोस्रो चरणमा हुने स्थानीय निवार्चनको कारण कक्षा ११ को परीक्षा मिति पुन परिवर्तन हुने भएको छ । असार १ गतेदेखि सञ्चालन गरिने भनिए पनि निर्वाचनको कारण नयाँ मितिबारे छलफल सुरु गरिएको छ ।
यद्यपी परीक्षाको मिति भने अझै टुंगो नलागेको राष्ट्रिय परीक्षा बोर्डका सदस्य सचिव डिल्ली राम रिमालले जानकारी दिए । शुरुका ३ विषयको परीक्षालाई पछि गर्ने गरी व्यवस्थापन गर्ने बारेमा नियन्त्रक डम्बर कुमार बतासले बताए । शुरुका केही परीक्षालाई पछि सारेर अरु यथावत राख्ने विकल्पमा छलफल भएको छ उनले भने, हामी यस बारेमा आन्तरिक छलफल गरेर निर्णय गर्छौ ।
हिसानका अध्यक्ष रमेश सिलवाल सहित बोर्ड पुगेको टोलीले परीक्षा जस्तो संवेदनशिल कुरामा शिक्षामन्त्री तथा समग्र मन्त्रालय र बोर्ड गम्भीर नभएको भन्दै चर्को आलोचना गरेका थिए ।
यस अघि बैशाख २४ गतेदेखि जेठ ३ गते सम्मका लागि तय भएको कक्षा ११ को परीक्षा पहिलो चरणको निर्वाचनको समयमै परेपछि असार १ गतेबाट गर्ने गरी सारिएको थियो । तर जेठ ३१ गते दोश्रो चरणको निर्वाचन गर्ने सरकारको निर्णयले सारिएको मिति फेरि परिवर्तन गर्नुपर्ने भन्दै बोर्डले आन्तरिक तयारी गरेको थियो ।
प्रकाशित मितिः २०७४ जेठ ३
वि.सं.२०७४ जेठ ३ बुधवार ११:५६ मा प्रकाशित