काठमाडौँ । तनहुँमा भएको कार दुर्घटनामा एकजना सांसदसहित चारजना घाइते भएका छन्।
काठमाडौँबाट पोखरातर्फ जाँदै गरेको बा८च ७५९१ नम्वरको कार अनियन्त्रित भएर तनहुँको घाँसीकुवा–२ देउरालीमा दुर्घटना हुँदा कालीकोटका एमाओवादीका सांसद ५५ वर्षीय महेन्द्र शाहीसहित कारमा सवार चारजना घाइते भएको जिल्ला प्रहरी कार्यालय तनहुँले जनाएको छ।
दुर्घटनाका कारण सांसद शाही सामान्य घाइते भएका छन्। दुर्घटनामा परी १८ वर्षीया माधुरी मगरको टाउँको र ढाडमा गहिरो चोट लागेकाले अवस्था गम्भीर रहेको जिल्ला प्रहरी कार्यालय तनहुँले जनाएको छ।
त्यसैगरी सोही स्थान निवासी १६ वर्षीया सुजा शाही र ३० वर्षीय देवेन्द्र शाही सामान्य घाइते भएका छन्। दुर्घटनामा परी घाइते चारैजनाको दमौलीस्थित रत्नहरि अस्पतालमा सामान्य उपचारपछि थप उपचारका लागि तत्कालै पोखरास्थित मणिपालमा पठाइएको जिल्ला प्रहरी कार्यालय तनहुँले जनाएको छ। उक्त कारका चालक सांसद शाही नै भएको बुझिइएको छ।
प्रकाशित मिति २०७२/१०/१२ मंगलबार २:२२:२०
वि.सं.२०७२ माघ १२ मंगलवार १४:२३ मा प्रकाशित
