काठमाडौं । माछापुच्छ्रे बैंकले यस वर्ष अघिल्लो वर्षको तुलनामा १८ करोड रुपैयाँ नाफा बढाएको हो ।
चैत मसान्तसम्म बैंकले ६२ करोड ४२ लाख रुपैयाँ खुद नाफा कमाएको छ । गत वर्षको सोही अवधिमा बैंकले ४४ करोड एक लाख रुपैयाँ नाफा गरेको थियो । बैंकले ३० करोड रुपैयाँ व्याज आम्दानी बृद्धि गर्यो ।
बैंकले चैत मसान्तसम्म एक अर्ब ३१ करोड रुपैयाँ खुद व्याज आम्दानी गरेको छ । गत वर्षको यही अवधिको तुलनामा यस्तो आम्दानी ३१ करोड रुपैयाँ बढी हो । व्याज आम्दानी बाहेक बैंकको अन्य स्रोतमा फि र कमिशन, विदेशी मुद्राको कारोबार र राइटव्याक प्रमुख छन् ।
यो अवधिमा बैंकले फि र कमिशन बापत १२ करोड ८८ लाख र विदेशी मुद्राको कारोबारबाट आठ करोड ४६ लाख रुपैयाँ कमाएको छ । साढे नौ करोड रुपैयाँ राइटव्याक गरेर आम्दानीमा जोडेको छ ।
बैंकले करिब सात अर्ब रुपैयाँ निक्षेप बढाएको छ भने कर्जा लगानी पाँच अर्ब रुपैयाँ भन्दा बढी विस्तार गरेको छ ।
नेपाल एसविआई बैंकले तेस्रो त्रैमासिक अवधिसम्म ९५ करोड रुपैयाँ खुद नाफा कमाएको छ । यो नाफा अघिल्लो वर्षको तुलनामा १२ करोड रुपैयाँ बढी हो । गत वर्ष तेस्रो त्रैमासिक अवधिसम्म बैंकले ८२ करोड ७९ लाख रुपैयाँ खुद नाफा कमाएको थियो । 
व्याज आम्दानी २३ करोड रुपैयाँ बढाएको छ । तेस्रो त्रैमासिक अवधिसम्म बैंकले एक अर्ब ७३ करोड रुपैयाँ खुद व्याज आम्दानी गरेको हो । बैंकको दास्रो ठूलो आम्दानी फि, कमिशनबाट देखिएको छ । यो शीर्षकमा बैंकले ४२ करोड रुपैयाँ कमाएको छ । विदेशी विनिमयबाट बैंकले नौ करोड कमायो भने राइटव्याक गरेर साढे पाँच करोड रुपैयाँ आम्दानीमा जोड्यो ।
बैंकले निक्षेप ६३ अर्ब रुपैयाँ पुर्याएको छ भने कर्जा लगानी ४६ अर्ब रुपैयाँ पुर्यायो ।
प्रकाशितः २०७३ वैशाख २५
वि.सं.२०७३ वैशाख २५ शनिवार १४:०९ मा प्रकाशित
