काठमाडौं । नेपाल स्टक एक्सचेञ्ज परिसूचक (नेप्से) ले सोमबार नयाँ रेकर्ड कायम गरेको छ । सोमबार नेप्से सूचक ३६ अंकले बढेर १७७१ अंकमा पुगेको छ ।
सोमबारको कारोबारमा बीमा र होटल समूह बाहेक सबै समुहगत उपसूचकहरु बढेका छन् । यो दिन बीमाको ९५ र होटलको सूचक २६ अंकले घटेको नेपाल स्टक एक्सचेञ्जले जनाएको छ ।
विशेष गरी बैंक समूह आज चार प्रतिशतले बढेको छ । राष्ट्रिय बिमा संस्थानमा लगानी गर्नेले आज सबैभन्दा बढी कमाएका छन् । बिमा संस्थानको सेयर १० प्रतिशतले बढेको छ भने सेन्चुरी बैंकको पनि १० प्रतिशतले नै बढेको छ ।
जेविल्स फाइनान्स, एक्सेल डेभलपमेन्ट बैंक, सिटिजन बैंक, लुम्बिनी बैंकको सेयर समान आठ प्रतिशतले बढेको छ । त्यसैगरी युनाइटेड फाइनान्स र सनराइज बैंक सात सात, गण्डकी विकास बैंक र सानिमा बैंकको सेयर छ छ प्रतिशतले बढेको छ ।
आज कुल कारोबार रकम रु एक अर्ब ७३ करोडको भएको छ भने ४९ लाख २५ हजार कित्ता सेयर किनबेच भएको छ । नेप्सेका अनुसार बिमा समूह १.०१ प्रतिशतले कमी आएको छ । जलविद्युत् समूहमा भने ०.५८ प्रतिशतले बढेको भए पनि त्यसले बजारमा प्रभाव पारेन ।
प्रकाशितः २०७३ असार १३
वि.सं.२०७३ असार १३ सोमवार १६:४७ मा प्रकाशित