मकवानपुर । बिहान सूर्योदयका बेला दामन सिमभञ्याङमा हिउँमा रमाउँदै टन्नै भेटिए । स्थानीयबासीहरु सहित आन्तरिक पर्यटकहरु हिँउ खेलिरहेका थिए ।
हिउँसँगै हिमालका अग्ला चुचुराको मनोरम दृष्यले अझै उनीहरुलाइ दङ्ग पारिदिएको थियो । उनीहरुको मनलाई लोभ्याईदियो ।
कोहि सेल्फी लिईरहेका थिए त कोहि भ्यूटावरबाट दृष्यावलोकन गरिरहेका भेटिन्थे । सुन्दर डाँडाकाँडा र प्राकृतिक मनोरम दृश्यले मनमोहक दामन र सिमभञ्याङ क्षेत्रले जो कोही पर्यटकलाई लालायित पार्छ । विसं २०६४ पछि राम्ररी हिउँ नपरेको र गत वर्ष पनि अन्तिम फागुनतिर सामान्य हिउँ परेकाले यो वर्ष सुरुवातमै हिउँ परेपछि सबैमा खुसीयाली छाएको छ । लगातार हिँउ पर्न थालेको सुनेपछि अहिले दामन सिमभञ्ज्याङमा पर्यटकको घुइचो नै लागेको छ ।
पोखरीमा जमेको पानी, पानी माथिपट्टि फुटेर सिसाका तिखा टुक्रा झरे जस्तै पानी जमेको दृश्य, अनि पखेराभरि हिउँले भरिएको दृश्यावलोकनमा पर्यटक लोभिएका थिए । घर, करेसाबारीदेखि सवारी साधनका सिसामा हिउँ भरिँदा साँच्चै नै दामनले मन्त्रमुग्ध पार्छ ।
प्रकाशित मितिः २०७३ पुस १९
वि.सं.२०७३ पुस १९ मंगलवार १८:४० मा प्रकाशित
