विमान दुर्घटनामा धेरैजसो खेलाडी गुमाएको ब्राजिलको फुटबल क्लब चापेकोएन्सले नयाँ सिजनका लागि २० खेलाडी अनुबन्ध गर्ने भएको छ । गएको महिना बोलिभियाबाट उडेको विमान कोलम्बियाको मेडेल्लिन शहर नजिक दुर्घटना हुँदा ब्राजिलको फुटबल क्लब चापेकोएन्सका १९ खेलाडीसहित ७१ जनाको ज्यान गएको थियो । शुक्रबारदेखि नयाँ सिजनका लागि प्रशिक्षण सुरु गरेको चापेकोएन्सले नयाँ सिजनका लागि २० खेलाडी अनुबन्ध गर्ने र विमान दुर्घटनामा बाँचेका खेलाडीको जर्सी नम्बर उनीहरुका लागि राख्ने बताएको हो ।
कोपा सुडअमेरिकानाको फाइनलका लागि जाँदै गरेका खेलाडी चढेको विमान दुर्घटना हुँदा कोचिङ स्टाफको पनि ज्यान गएको थियो । उपाधि चापेकोएन्सलाई प्रदान गरिएको थियो । फाइनलको प्रतिस्पर्धी कोलम्बियाको क्लब एथ्लेटिको नेशिओनललाई फेयर प्ले अवार्ड दिइएको थियो । कोलम्बियन क्लबको प्रस्तावमा चापेकोएन्सका खेलाडीको सम्मानमा उपाधि प्रदान गरिएको थियो । लोनसहितका विभिन्न स्रोतबाट खेलाडी अनुबन्ध गर्ने तयारी भएको चापेकोएन्सका निर्देशक रुइ कोस्टाले बताए । ब्राजिलमा आउँदो जनवरी देखि नयाँ सिजन सुरु हुँदैछ । चापेकोएन्सले जनवरी २६ मा जोइनभिल्लेसँग सिजनको पहिलो खेल खेल्ने छ । विमान दुर्घटनामा धेरै खेलाडीको ज्यान गएपछि फुटबल लिगले क्लबलाई तीन सिजनसम्म रेलिगेशनबाट जोगाउने प्रस्ताव गरेको थियो । तर क्लबले त्यो प्रस्ताव अस्वीकार गरेको छ ।
प्रकाशित मितिः २०७३ पुस २०
वि.सं.२०७३ पुस २० बुधवार १४:२२ मा प्रकाशित
