काठमाडौ । बुटवल पावर कम्पनीको प्रिमियम भाउ परिवर्तन हुने भएको छ । बुटवल पावरले १०० रुपैयाँ अंकित मूल्यमा ४१८ रुपैयाँ थप गरी ५१८ रुपैयाँका दरले एफपीओ निष्कासन गर्ने प्रस्ताव गरेको छ ।
यसअघि १०० रुपैयाँ अंकित मूल्यमा ३७० रुपैयाँ प्रिमियम जोडेर ४७० रुपैयाँमा एफपीओ ल्याउने तयारी गरेको थियो । कम्पनीको जेठ २१ मा बसेको सञ्चालक समिति बैठकले प्रतिकित्ता ५१८ रुपैयाँका दरले ४० लाख ८१ हजार कित्ता एफपीओ निष्कासन गर्ने निर्णय गरेको हो ।
यो प्रस्ताव कार्यान्वयन गर्न नियामक निकाय नेपाल धितोपत्र बोर्डबाट अनुमति लिनुपर्ने हुन्छ । कम्पनीले बिक्री प्रबन्धकको जिम्मा एनएमबी क्यापिटल तथा लक्ष्मी क्यापिटललाई दिई सकेको छ ।
एफपिओबाट संकलित रकम कम्पनीले निमार्ण सुरु गरेका आयोजनामा लगानी गरिने बताइएको छ । कम्पनीले ३० मेगवाटको न्यादी जलविद्युत आयोजना र ३७ दशमलव छ मेगावाटको काबेली ए जलविद्युत आयोजना निमार्ण गर्ने घोषण गरेको छ । यी आयोजना विदेशी साझोदार तथा स्वदेशी साझेदारसँगको सहकार्यमा सन् २०२० सम्म सम्पन्न गर्ने कम्पनीको लक्ष्य रहेको छ ।
साथै बीपीसी एक सय मेगावाटको मनाङमस्र्याङ्दी आयोजनाको अनुमति लिने क्रममा रहेको छ भने ८५ मेगावाटको चिनीखोला साना जलविद्युत आयोजना सम्भाब्यता अध्ययन पुरा गरिसकेको छ ।
कम्पनीले गत चैत १३ गते नै एफपीओ निष्काशनको अनुमति माग्दै धितोपत्र बोर्डमा आवेदन गरेको थियो ।
प्रकाशित मितिः २०७४ जेठ २४
वि.सं.२०७४ जेठ २४ बुधवार ११:२८ मा प्रकाशित
