काठमाडौ । साताको अन्तिम कारोबार दिन सेयर बजार १८.३३ अंकले घटेर १५८०.०३ अंकमा कायम भएको छ । कारोबार भएका सबै समूहहरु ओरालो लागेका छन् । सबैभन्दा धेरै बीमा समूह १४७.१ अंकले घटेको छ ।
केही दिनदेखि लगातार बढेर झन्डै अर्ब पुग्न लागेको कारोबार विहीबार ओरालो लागेको छ । दिनभरिमा १६० वटा कम्पनीको १५ लाख ७२ हजार ३२ कित्ता सेयर १० हजार चार सय ५९ पटक खरिदविक्री हुँदा ८४ करोड ९१ लाख रुपैयाँ बराबरको कारोबार भएको छ ।
कुल कारोबारमध्ये, एनआईसी एसिया बैंकको छ करोड २६ लाख रुपैयाँको सेयर कारोबार भएको छ । आरएसडीसी लघुवित्त र छिमेक लघुवित्तको पौने चार करोडको कारोबार भएको छ भने निर्धन उत्थान बैंक, नेपाल इन्भेष्टमेन्ट बैंक, नेपाल लाइफ इन्स्योरेन्स र नविल बैंकको दुई करोडमाथिको कारोबार भएको छ । नेपाल लाइफ प्रोमोटर, सानिमा बैंक, प्राइम बैंक लगायतको एक करोडमाथिको कारोबार भएको छ ।
गुमाउने कम्पनीहरुको अग्रस्थानमा रहेको सिद्धार्थ इन्भेष्टमेन्ट ग्रोथ स्किमका सेयरधनीले ९.९९५९ प्रतिशतका दरले आफ्नो सम्पत्ति गुमाउँदा भार्गव विकास बैंक, सेन्ट्रल फाइनान्स, पूर्णिमा विकास बैंक र वल्र्ड मर्चेन्ट बैंकिङका सेयरधनीले क्रमशः ६.०७, ५.८२, ५.३४ र ५ प्रतिशतका दरले गुमाएका छन् । हिमालयन पावर पार्टनर, सिनर्जी पावर, मिसन डेभलपमेन्ट बैंक, सिन्धु विकास बैंक, महिला सहयात्रा माइक्रोफाइनान्स लगायतका सेयरधनीले पनि गुमाएका छन् ।
प्रकाशित मितिः२०७४ भदौ १५
वि.सं.२०७४ भदौ १५ बिहीवार १५:२८ मा प्रकाशित
