Logo

किसानका मिर्गौलामा समस्या

बुटवल । शरीरमा पानीको मात्रा पर्याप्त नहुनु र लामो समयसम्म खेतबारीमा काम गर्ने कारणले रुपन्देहीका अधिकांश किसानमा मिर्गौलाको समस्या देखिएको छ । खेतबारीमा काम गर्दा लामो समयसम्म शरीरलाई चाहिने पर्याप्त पानी नपिउने र लगातार काम गर्दा शरीरमा रहेको पानी पसिनाका माध्यमबाट बाहिरिने हुँदा पानीको मात्रा कम भएर मिर्गौलामा संक्रमण देखिएको हो ।

स्वास्थ्य मन्त्रालय र नेपाल किडनी फाउन्डेशन काठमाडौंको आयोजना तथा ब्रिज अफ लाइफ अमेरिकाको सहयोगमा रुपन्देहीका विभिन्न स्थानमा सञ्चालित निःशुल्क मिर्गौला परीक्षण शिविरमा झण्डै १८ प्रतिशत व्यक्तिका मिर्गौलामा समस्या देखिएको फाउन्डेशनका अध्यक्ष डा शक्ति बस्नेतले जानकारी दिए । खासगरी किसान केन्द्रित सो शिविरमा लक्षित वर्गमा मुख्यतया जनचेतनाको मुख्य समस्या रहेको उनले बताए । जनचेतनाको अभावमा अधिकाँश ५० वर्ष भन्दामाथि उमेर समूहका व्यक्तिका मिर्गौलामा समस्या देखिएको छ । “ग्रामीण क्षेत्रका सर्वसाधारणमा मिर्गौला स्वस्थ राख्नुपर्ने विषयमा जनचेतनाको अभावसँगै मानिसको दैनिक खानपिन र बानीव्यवहारमा सुधार नहुनु र अनावश्यक तनाव जस्ता कारणले उच्च रक्तचाप र मधुमेहको समस्या धेरैमा देखिएको छ”, डा बस्नेतले भने ।

उच्च रक्तचाप र मधुमेहको समस्या भएका अधिकांश बिरामीको मिर्गौलामा संक्रमण देखिएको छ । मानिसले मिर्गौला स्वस्थ राख्न पानी तथा झोल पदार्थ बढी पिउने, खानपानमा ध्यान दिने र नियमित रक्तचाप, मधुमेह र मिर्गौलाको परीक्षण गराउनु जरुरी रहेको सुझाव दिइएको छ ।

रुपन्देहीको बुटवल उपमहानगरपालिका– १३ र १४ को नयाँ गाउँमा दुई दिन र तिलोत्तमा नगरपालिकाको कोटिहवामा दुई दिन शिविर सञ्चालन गरिएको थियो । उनले रुपन्देहीका तीन स्थानमा सञ्चालित शिविरबाट झण्डै एक हजार दुई सय जनाले निःशुल्क सेवा प्राप्त गरेको र सोक्रममा बिरामीलाई रोगअनुसारको निःशुल्क औषधि वितरण गरिएको थियो । सर्वसाधारणलाई मिर्गौलाको निःशुल्क परीक्षणसंँगै मिर्गौला स्वस्थ राख्न जनचेतना जगाउने उद्देश्यले फाउन्डेशनले देशका ग्रामीण क्षेत्रमा निःशुल्क शिविर सञ्चालन गर्दै आएको कार्यक्रम संयोजक गणेश उप्रेतीले जानकारी दिए । रासस

प्रकाशित मितिः २०७४ कार्तिक २९

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com