धादिङ । धादिङ क्षेत्र नं. २मा नेकपा एमालेका वैकल्पिक केन्द्रीय सदस्य खेमप्रसाद लोहनी विजयी भएका छन् । लोकतान्त्रिक गठबन्धनका उम्मेदवा एवं कानु तथा संसलिय मामिला राज्यमन्त्री दिलमान पाख्रिनलाई ६४० मतले पछाडी पार्दै लोहनी विजयी भएका हुन् । लोहनीले ३६,२५४ मत प्राप्त गरेका छन् भने पाख्रिनले ३५,६१४ मत प्राप्त गरेका थिए ।
जिल्लाको अन्तिम मत परिणाम सार्वजनिक भएसंगै धादिङको दुई वटा प्रतिनिधिसभा र चार वटा प्रदेश सभामा बाम गठबन्धनले क्लिनस्विप गरेको छ । क्षेत्र नं. १ मा एमाले धादिङका कार्यवाहक अध्यक्ष भुमि त्रिपाठीले देशभरको फराकिलो मतान्तरको रेकर्ड कायम गर्दै विजयी भएा छन् । प्रदेशसभा तर्फ १(१) बाट एमाले पोलिटव्युरो सदस्य राजेन्द्र पाण्डे, १(२) बाट नेकपा माओवादी केन्द्र धादिङका अध्यक्ष शालिकराम जमकट्टेल, २(१) बाट एमाले प्रदेश कमिटि सदस्य डा. रामकुमार अधिकारी र २(२) बाट माओवादी केन्द्र निकट ट्रेड युनियन महासंघका महासचिव जगत सिंखडाले विजय हासिल गरेका छन् ।
यस अघि तीन क्षेत्र रहेको धादिङमा २०७० को संविधान सभा निर्वाचनमा नेकपा एमालेले तीन वटै क्षेत्र र २०६४ को संविधान सभा निर्वाचनमा माओवादी केन्द्रले तीन वटै क्षेत्र जितेर कम्युनिष्टको लाल किल्ला बनाएका थिए ।
प्रकाशित मिति २३ मंसिर २०७४
वि.सं.२०७४ मंसिर २३ शनिवार ०८:१७ मा प्रकाशित
