Logo

पाटाको अध्यक्षमा सुनिल शाक्य

काठमाडौँ । प्यासिफिक एसिया ट्राभल एशोसिएसन (पाटा नेपाल च्याप्टर) को ४१ औँ वार्षिक साधारणसभाले पर्यटन व्यवसायी सुनिल शाक्यको अध्यक्षतामा नयाँ कार्यसमिति चयन गरेको छ ।

पाटाको निर्वतमान अध्यक्षमा सुमन पाण्डे, प्रथम उपाध्यक्षमा नेपाल पर्यटन बोर्डका सीईओ दीपकराज जोशी, उपाध्यक्षमा नेपाल वायु सेवा निगमका ‘कर्पोरेट’ निर्देशक जनकराज कालाखेती, महासचिवमा विभुतिचन्द ठाकुर र कोषाध्यक्षमा शिवप्रसाद ढकाल निर्विरोध निर्वाचित भएका छन् ।

सदस्यमा नेपाल पर्यटन बोर्ड, पर्यटन विभाग, नेपाल वायुसेवा निगम र नेपाल नागरिक उड्डन प्राधीकरण (क्यान) पदेन सदस्य रहेका छन् भने अन्य सात जना निजी क्षेत्रबाट सदस्य चयन भएको पाटाद्वारा आज जारी विज्ञप्तिमा उल्लेख छ ।

पाटाले नेपालको पर्यटन क्षेत्रमा विशिष्ट योगदान पु¥याउने एक जना पर्यटन व्यवसायीलाई प्रदान गर्ने पाटा ‘पर्सनालिटी अवार्ड–२०१७’ बाट वरिष्ठ पर्यटन व्यवसायी तथा सकारात्मक सोचका अभियानता कर्ण शाक्यलाई सम्मान गरेको छ ।

पर्यटकीय पूर्वाधार निर्माणलाई तीब्रता दिनुपर्छ : पर्यटन सचिव

संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपानेले पर्यटन क्षेत्रको समग्र विकासका लागि पर्यटकीय पूर्वाधार निर्माणलाई तीब्रता दिइनुपर्ने खाँचो औँल्याएका छन् ।

प्यासिफिक एसिया ट्राभल एशोसिएसन (पाटा नेपाल च्याप्टर) को ४१ औँ वार्षिक साधारणसभालाई सम्बोधन गर्दै सिचव न्यौपानेले निर्माणाधीन गौतमबुद्ध अन्तर्राष्ट्रिय विमानस्थल र पोखरा क्षेत्रीय अन्तर्राष्ट्रिय विमानस्थलको काम चाँडो सकेको खण्डमा पर्यटन क्षेत्रमा ठूलो परिवर्तन आउने उल्लेख गरे ।

“धार्मिक तथा प्राकृतिक पर्यटनलाई प्राथमिकतामा राखेर पर्यटन प्रवद्र्धनको अभियानलाई प्रभावकारी रुपमा लैजानुपर्छ,”–सचिव न्यौपानेले भने –“नयाँ संभावना बोकेका गन्तव्यको प्रचार–प्रसार गरी गुणस्तरीय पर्यटकीय सेवा उपलब्ध गराउन सके पर्यटन क्षेत्रले चाँडै फड्को मार्ने देखिन्छ ।”

कार्यक्रममा राष्ट्रिय योजना आयोगका पूर्व उपाध्यक्ष डा युवराज खतिवडाले मुलुकको आर्थिक समृद्धिका लागि आगामी मार्गचित्र प्रस्तुत गर्दै पर्यटनको माध्यमबाटै आर्थिक समृद्धि हासिल गर्न सकिने उल्लेख गरे ।

उनले भने –“पर्यटनबाटै आर्थिक समृद्धि संभव छ, तर अहिलेको अवस्था सन्तोषजनक छैन्, त्यसैले पर्यटन क्षेत्रको विकासका लागि पर्यटकीय पूर्वाधार विकासका साथै सेवामा विविधिता र गुणस्तर बनाउनेतर्फ सरकार र निजी क्षेत्रको सक्रियता जरुरी छ ।”

नेपाल पर्यटन बोर्डका प्रमुख कार्यकारी अधिकृत (सीईओ) दीपकराज जोशीले पर्यटकीय संभावना बोकेका नयाँ गन्तव्यको खोजी गरी व्यापक प्रवद्र्धन गरिनुपर्नेमा जोड दिए ।

पाटा नेपाल च्याप्टरका निवर्तमान अध्यक्ष सुमन पाण्डेले भूकम्पपछिको पर्यटन पूर्ववत अवस्थामा फर्किएको र अब बन्ने स्थिर सरकारले पर्यटकीय पूर्वाधार विकासलाई विशेष प्राथमिकताका साथ अघि बढाएमा पर्यटनले फड्को मार्ने दाबी गरे ।

प्रकाशित मिति ः २८ मंसिर २०७४

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com