काठमाडौँ । बजारमा राम्रो वित्तिय प्रभाव छाडेको चन्द्रागिरि हिल्सले सर्वसाधरणको लागि सेयर जारी गर्ने भएको छ । हिल्सले शेयर निष्काशनका लागि प्रकृया अघि बढाएको छ । कम्पनीको अर्को साता हुने साधारणसभाले शेयर निष्काशनको निर्णय गर्ने भएको छ ।
सर्वसाधारणलाई विकासमा साझेदार बनाउन सर्वसाधरणमा जाने तयारी गरेको कम्पनीले जनाएको छ । कम्पनीले स्थानीय र सर्वसाधरणलार्इ कति शेयर दिने भन्ने बारेमा टुंगोमा पुगेको छैन । ‘स्थानीय र सर्वसाधरणलार्इ कति शेयर जारी गर्ने भन्ने बारेमा छलफल चलिरहेको कम्पनीले जनाएको छ ।
कम्पनीको साधारणसभा यही पुस २५ गते हुँदैछ । आउँदो साधारणसभाबाट शेयर निष्काशनबारे निर्णय लिने तयारी रहेको कम्पनीका सञ्चालक अम्बिका पौडेलले जानकारी दिए । कम्पनी २०७१ सालमै पब्लिक कम्पनीमा रुपान्तरण भएको थियो।
कम्पनीले साढे तीन अर्ब रुपैयाँ लगानीमा चन्द्रागिरि केवलकार निर्माण गरेको हो । कम्पनीले केवलकार नजिकै लक्जरियस होटल समेत निर्माण गरिरहेको छ । आर्इएमर्इ र भाटभटेनी समूहको लगानीमा यो केवलकार निर्माण भएको हो।
चन्द्रागिरीमा केवलकारसँगै मन्दिर, भ्युटावर, फोरडी हल, प्लेग्राउण्ड, बार तथा रेष्टुरेण्टहरु निर्माण गरिएको छ। नेपाल धितोपत्र वोर्डले दर्ता तथा निष्काशन नियमावली २०७३ मा शेयर बजारमा आउन वास्तविक क्षेत्रका कम्पनीले १० प्रतिशत मात्र शेयर जारी गर्न पाउने प्रावधान ल्याएको छ। यस अघि ३० प्रतिशत शेयर प्राथमिक निष्काशनमा बेच्नै पर्ने बाध्यकारी प्रावधान थियो।
२०७४ पुष १९ गते प्रकाशित
वि.सं.२०७४ पुस १९ बुधवार १४:२७ मा प्रकाशित