काठमाडौं । साताको अन्तिम दिनको सेयर बजारमा सामान्य गिरावट देखिएको छ ।
नेप्से ०.१० अंकले घटेर १३८६.९८ विन्दुमा बन्द भएको छ । कारोबारमा आएका अधिकाशं समूहका सूचक नकारात्मक रहेपछि बजार सामान्य घटेको हो । बजार घटेपनि अघिल्लो कारोबारको तुलनामा कारोबार रकममा भने सुधार आएको छ । विहीबार समग्र बजार पूँजीकरण १६ खर्ब २२ अर्ब रूपैयाँमा समेटिएको छ ।
विहीबार नेप्सेमा १५७ कम्पनीको १० लाख ८६ हजार ४१ कित्ता शेयर ४२ करोड ५० लाख रुपैयाँमा किनबेच भयो । बुधबार तुलनामा कारोबार रकम १४ करोड बढी हो । नेपाल लाइफ इन्स्योरेन्सको संस्थापको सेयरको कारोबारले पनि कारोबार रकम उकास्न टेवा पुर्याएको छ। यसदिन नेपाल लाइफको ५ करोड ५० लाख बराबरको संस्थापक सेयरको कारोबार भयो ।
नयाँ सरकार गठन भएपनि मन्त्रालय बाँडफाँड लगायतका काम हुन नसक्दा सेयरबजारका लगानीकर्ता अझै पर्ख र हेरको अवस्थामै देखिएका छन् । यतिबेला सेयरबजारमा अर्थमन्त्री को बन्ला बन्ने बिषयले समेत चर्चा पाएको छ ।
विहीबार १३८७.१० अंकमा खुलेको बजार पहिलो दुई घण्टा नकारात्मक रहेपछि त्यसपछि तिब्र गतिले बढेर १३९५ अंकसम्म पुगेको थियो । तर पछिल्लो आधा घण्टामा ओरालो लागेको बजार १३८६ विन्दुमा झरेको हो ।
कारोबार भएका उपसूचकमध्ये वाणिज्य बैंक, होटल, जलविद्युत, बीमा र लघुवित्त समूहको सूचक ओरालो लागेको छ। यस दिन बीमा समुहको परिसुचक सबैभन्दा बढी ३४.६६ अंकले घटेको छ ।
त्यस्तै होटल ९.९४,माइक्रोफाइनान्स ४.४८, हाइड्रोपावर ३.१५ र बैंकिङ समुह ० .४१ अंकले घटेको छ । विकास बैंक, वित्त, उत्पादन र अन्य समूहको सूचक बढेको छ ।
विहीबारको कारोबारमा बोटलर्स नेपाल तराईको शेयर सबैभन्दा धेरै ३.९८ प्रतिशतले बढेको छ भने नागबेली लघुवित्तको शेयर ३.८३ प्रतिशतले घटेको छ ।
२०७४ फागुन १० मा प्रकाशित
वि.सं.२०७४ फागुन १० बिहीवार १६:११ मा प्रकाशित
