काठमाडौं । फोर एच नेपालको आयोजनामा चैत्र महिनामा दोस्रो युवा कृषि उद्यम सम्मेलनको आयोजना हुने भएको छ । सम्मेलन चैत्र २४ र २५ गते काठमाडौंमा आयोजना गरिने आयोजकले जनाएको छ ।
देशभरीबाट सम्मेलनमा दुई सय भन्दा बढी युवा कृषि उद्यमीहरुको सहभागिता रहने आयोजकले बताएको छ । पहिलो युवा कृषि उद्यम सम्मेलन २०७३ असार २० र २१ गते काठमाडौंमा आयोजना भएको थियो ।
सम्मेलनमा सहभागिताको खुल्ला आवेदन खुला आह्वान गरेको फोर एच नेपालका कार्यकारी निर्देशक नन्द देवकोटाले जनाएका छन् । सहभागिताका लागि इमेल, फेसबुक, ट्वीटर, ह्वाट्याप, भाइवर, म्यासेज तथा टेलिफोनबाट पनि आवेदन दिन सकिने देवकोटा बताएका छन् ।
सम्मेलनको पहिलो चरणमा चैत्र २० गते संघीयतामा कृषि नीति विषयक राष्ट्रिय बहसको आयोजना गरिने छ । जसमा नेपाल सरकार, राष्ट्रिय योजना आयोग, राष्ट्रिय किसान आयोग नीजि क्षेत्र, दातृ निकाय तथा विज्ञहरुको सहभागिता रहने आयोजकले जानकारी दिएको छ । र, चैत्र २६ गते राष्ट्रिय रणनीतिक कार्यशालाको आयोजना गरिने पनि जनाइएको छ । यसले २ वर्षको कृषि उद्यमी रणनीति तय गर्नेछ ।
युवा कृषि उद्यम सम्मेलनमा १५ ओटा फरक फरक विषयमा छलफल गरिनेछ । जसमा समानान्तर कार्यशाला, प्लेनरी सेसन, कार्यपत्र प्रस्तुति, अनुभव आदानप्रदान लगायतका कार्यक्रम तय गरिएको संस्थाका अध्यक्ष लोकराज अवस्थीले जनाकारी दिए । सम्मेलन अन्तर्राष्ट्रिय मोडेल संचालन गरिने उनले बताए ।
सम्मेलनमा दिगो विकास लक्ष्य र कृषि, युवा उद्यमीकरण र कृषि, कृषि र प्रविधि, संघीय ढाँचामा कृषि उद्यमशीलता, कृषिको बजारीकरण लगायतका विषयमा राष्ट्रिय बहस हुने आयोजकले बताएको छ ।
२०७४ फागुन १८ गते प्रकाशित
वि.सं.२०७४ फागुन १८ शुक्रवार २३:३२ मा प्रकाशित