काठमाडौं । धितोपत्र बोर्डले इन्टरनेट मार्फत सेयर खरिदबिक्रीको आदेश दिन सक्ने व्यवस्था कार्यान्वयनमा ल्याउन ब्रोकरहरुलाई निर्देशन दिएको छ । २०७५ सालको सुरुका दिनदेखि नै यस प्रणाली कार्यान्वयनमा ल्याई लगानीकर्तालाई इन्टरनेटबाट सेयर किनबेच आदेश दिने व्यवस्था मिलाउन बोर्डले ब्रोकरहरुलाई परिपत्र गरेको हो ।
लगानीकर्ताले आफ्नो ब्रोकर अफिसबाट उक्त सफ्टवेर लिएर घरमै बसी सेयर खरिद बिक्रीको आदेश गर्न सक्नेछन् ।
धितोपत्र बोर्डका अनुसार सेयर कारोबार प्रकृयालाई थप सहज, पारदर्शी एवं लगानीकर्ता मैत्री बनाउन नयाँ प्रविधि अवलम्बन गर्नुपर्ने भएको हो । यसैगरी, ब्रोकर कार्यालयमा रहने कारोबार सम्बन्धी अभिलेखलाई अझ व्यवस्थित र सुदृढ बनउन पनि इन्टरनेट प्रणाली आवश्यक रहेको बोर्डको भनाई छ ।
हाल प्रयोग भइरहेको ब्रोकर व्याक अफिस सफ्टवेरमा इन्टरनेट मार्पmत प्राप्त खरिद बिक्री आदेश दिने व्यवस्था लागू गर्न धितोपत्र बोर्डले यसअघि २०७३ फागुन २६ मा पनि ब्रोकरहरुलाई परिपत्र जारी गरेको थियो ।
यो प्रणाली लागू भएपछि ब्रोकर कार्यालयको अभिलेख पारदर्शी हुने तथा नेप्सेले कार्यान्वयनमा ल्याउन लागेको अनलाइन प्रणालीको आधार तय गर्नसमेत थप सहज हुने बोर्डको भनाई छ । 
२०७४ चैत ३० गते प्रकाशित
वि.सं.२०७४ चैत ३० शुक्रवार १५:३८ मा प्रकाशित
