काठमाडौ । कुमारी बैंकको २० प्रतिशत हकप्रद सेयर सुरक्षित गर्ने आइतबार अन्तिम दिन हो । कुमारीले हकप्रद जारी गर्न वैशाख १० गते बुक क्लोज गर्दैछ । कुमारीको हकप्रद सुरक्षित गर्न पनि आइतबारसम्म यो बैंकको सेयरधनी बनेको हुनुपर्नेछ ।
कुमारीले १०ः२ अनुपातमा १ करोड १९ लाख ३८ हजार ९९१.६५ कित्ता हकप्रद बिक्री गर्न धितोपत्र बोर्डबाट अनुमति पाइसकेको छ । राष्ट्र बैैंकले तोकेको ८ अर्ब रुपैयाँ चुक्ता पुँजी पुर्याउने क्रममा कुमारीले हकप्रदको बाटो रोजेको हो ।
गत वर्ष पनि बैंकले ५० प्रतिशत हकप्रद सेयर बिक्री गरेको थियो । हाल कुमारीको चुक्ता पुँजी ५ अर्ब ९६ करोड ९४ लाख ९६ हजार रुपैयाँ छ । २० प्रतिशत हकप्रद बिक्रीपछि चुक्ता पुँजी ७ अर्ब १६ करोड ३३ लाख ९५ हजार १६५ रुपैयाँ पुग्नेछ । ८ अर्ब रुपैयाँ चुक्ता पुँजी पुर्याउन नपुग रकम कुमारीले बोनस सेयर दिएर पुर्याउन सक्नेछ । यसमा बिक्री प्रबन्धकको काम एनआइबीएल एस क्यापिटलले गर्नेछ ।
२०७५ बैशाख ९ गते प्रकाशित
वि.सं.२०७५ वैशाख ९ आइतवार १४:५१ मा प्रकाशित