काठमाडौं। ‘बोलेको एकथोक हुन्छ, ब्याख्या अर्कै भएर आउँछ’ अर्थमन्त्रीले यसो भने अरे भनेर हल्ला फिँजाएर निश्चित मान्छेले फाइदा उठाइरहेका छन्। पूँजी बजार नबुझ्ने अर्थमन्त्रीजस्तो चित्रण गरिएको छ । धेरैले पूँजी बजारको बारेमा क, ख, ग जानेका समेत थिएनन् । २०४३ सालमै पूँजी बजारका बारेमा किताव लेखेर छापिसकेको छु।
अर्थमन्त्री डा.युवराज खतिवडा नेपाल धितोपत्र वोर्डले आयोजना गरेको ‘क्यापिटल एक्सपो’ मा आफ्नो गुनासो साझा गर्दै थिए। उनले आँफै एक्सपोमा आउनुको कारणसमेत खुलाए। पूँजी बजारको बारेमा धेरे पढियो, लेखियो, बुझियो। एकथोक भनिएको हुन्छ। अर्कैथोक ब्याख्या गरिन्छ। पूँजी बजारसमेत नबुझ्ने अर्थमन्त्रीसम्म भनिन्छ।
आँफुले एउटा कुरा बोल्यो, अर्को व्याख्या भएर आउँछ। अनि अर्थमन्त्रीले यसो भनिदिए भनेर बजारलार्इ वेवकुभ बनायो अनि आँफूले फाइदा उठाएर हिँड्यो। त्यही भएर सबैलाई प्रस्टसँग भन्नका लागि म कार्यक्रममा आएको हुँ । उनले अर्थमन्त्री हुनुभन्दा धेरै अगाडिबाट शेयर बजारका बारेमा अध्ययन अनुसन्धान गरेको बताए। ‘मैले पूँजी बजारको बारेमा २०४३ सालमै किताव लेखेर छापिसकेको छु,’ उनले भने, ‘तर, त्यतिबेलाको पूँजी बजारले आजको दिनमा धेरै फड्को मारिसकेको छ।‘
उनले त्यसबेला नेपाल स्टक एक्सचेन्जमा ५० वटा कम्पनी पनि सुचीकरण नभएको बताउँदै अहिले संख्या धेरै पुगिसकेको बताए। अर्थमन्त्रीले नेप्सेमा एकै किसिमका कम्पनी सूचिकृत भएकोमा चिन्ता ब्यक्त गरे। बैंक तथा वित्तीय संस्थावाहेक पनि नयाँ क्षेत्रलाई पूँजी बजारमा छिराउनु पर्ने उनले बताए।
२०७५ बैशाख २६ गते प्रकाशित
वि.सं.२०७५ वैशाख २६ बुधवार १३:२६ मा प्रकाशित