काठमाडौं । नाडेप लघुवित्त वित्तीय संस्थाले १०० रुपैयाँ दरको ४ लाख ८० हजार कित्ता आइपीओ निष्कासन गर्ने भएको छ । ४ करोड ८० लाख रुपैयाँ बराबरको आइपीओ असार १० गतेदेखि बिक्री गर्ने कम्पनीले जनाएको छ ।
यसमध्ये ५ प्रतिशत अर्थात २४ हजार कित्ता कम्पनीका कर्मचारी र २४ हजार कित्ता सामूहिक लगानी कोषलाई दिइनेछ । त्यसपछि बाँकी ४ लाख ३२ हजार कित्ता सर्वसाधारणलाई बिक्री गर्न लागिएको हो ।
आइपीओमा असार १३ गतेसम्म आवेदन दिन सकिनेछ । न्यूनतम २० कित्तादेखि अधिकतम २ हजार ४०० कित्तासम्म आवेदन दिन सकिनेछ कम्पनीले जनाएको छ ।
बिक्री प्रबन्धक नबिल इन्भेष्टमेन्ट बैंकिङ लिमिटेड, नक्साल काठमाडौं, तथा नाडेप लघुवित्त वित्तीय संस्थाको केन्द्रीय कार्यालय गजुरी १, धादिङबाट पनि आवेदन दिन सक्नेछन् । त्यसैगरी, आस्वा सदस्य सम्पूर्ण बैंक तथा वित्तीय संस्थाबाट आवेदन दिन सकिनेछ । सी–आस्वाबाट घरमै बसेर पनि भर्न मिल्नेछ ।
चुक्ता पुँजी ११ करोड २० लाख रुपैयाँ भएको नाडेप लघुवित्तको आइपीओ बिक्रीपछि चुक्ता पुँजी १६ करोड रुपैयाँ पुग्नेछ । चालु आर्थिक बर्षको तेश्रो त्रैमाससम्ममा कम्पनीले ४ करोड ४६ लाख रुपैयाँ खुद नाफा कमाएको छ ।
२०७५ असार १ गते प्रकाशित
वि.सं.२०७५ असार १ शुक्रवार ११:४५ मा प्रकाशित
