काठमाडौं । धितोपत्र बोर्डले नेपाल बैंकलाई एफपीओ बिक्री गर्न अनुमति दिएको छ । नेपाल बैंकले ४ अर्ब ९५ करोड १७ लाख ६० हजार २४० रुपैयाँ बराबरको १ करोड ७६ लाख ८४ हजार ८५८ कित्ता एफपीओ बिक्री गर्न अनुमति दिएको हो । बैंकले फेस भ्यालु १०० रुपैयाँमा १८० रुपैयाँ प्रिमियम जोडेर प्रतिकित्ता २८० रुपैयाँ दरमा एफपीओ बिक्री खुला गर्नेछ ।
सरकारी स्वामित्वको बैंकले नेपाल सरकारको हिस्सा ५१ प्रतिशत र सर्वसाधारणको ४९ प्रतिशत कायम गर्न एफपीओ जारी गर्न लागेको हो । हाल यस बैंकको चुक्ता पुँजी ८ अर्ब ४ करोड २६ लाख ६२ हजार रुपैयाँ रहेको छ । एफपीओ बिक्री पछि चुक्ता पुँजी ९ अर्ब ८१ करोड ११ लाख ४८ हजार रुपैयाँ पुग्नेछ । यसमा बिक्री प्रबन्धकको काम सिद्धार्थ क्यापिटलले गर्नेछ ।
एफपीओको प्रिमियमबाट आएको पैसा भने जगेडा कोषमा जानेछ । चालु आर्थिक वर्षको तेस्रो त्रैमासमा नेपाल बैंकले २ अर्ब ५६ करोड ७७ लाख २८ हजार रुपैयाँ खुद नाफा कमाएको छ । प्रतिसेयर आम्दानी ४२ रुपैयाँ ५७ पैसा रहेको यस बैकको प्रतिसेयर नेटवर्थ १७४ रुपैयाँ ३१ पैसा छ ।
२०७५ असार ४ गते प्रकाशित
वि.सं.२०७५ असार ४ सोमवार ११:०९ मा प्रकाशित
