काठमाडौं । देवः विकास बैंकको २० लाख २० हजार कित्ता लिलामी सेयर भर्ने समय शुक्रबारसम्मलाई तोकिएको छ । बैंकले असार १ गतेदेखि २० लाख २० हजार ५९.५९ कित्ता सेयर लिलामीमा बिक्री गरिरहेको छ । संस्थापक समूहको १४ लाख ७९ हजार २६४. ८८ कित्ता र सर्वसाधारण समूहको ५ लाख ४० हजार ७९४.७१ कित्ता सेयर लिलामी प्रक्रियामा ल्याइएको हो । संस्थापक समूहको सेयरमा न्यूनतम १ हजार कित्ता र सर्वसाधारण समूहमा १०० कित्ता सम्म आवेदन दिन सकिनेछ ।
यसअघि देवः ले चैत २६ गतेदेखि वैशाख ३१ गतेसम्म ६५ लाख ३३ हजार १०८.५९ कित्ता हकप्रद सेयर बिक्री खुला गरेको थियो । जसमा १९ हजार ९५३ जनाबाट ४५ लाख १३ हजार ४९ कित्ता सेयरको लागि मात्र आवेदन परेको थियो । बाँकी रहेको सेयर अहिले लिलामीबाट बेचिएको हो ।
लगानीकर्ताले एनआइबीएल एस क्यापिटल लिमिटेड लाजिम्पाट काठमाडौं तथा शाखा कार्यालय लालदरबार काठमाडौं, ललितपुर, पोखरा, बुटवल, वीरगञ्ज र विराटनगरबाट पनि आवेदन दिन सक्नेछन् । त्यसैगरी, नेपाल इन्भेष्टमेन्ट बैैंकको सुर्खेत, नेपालगञ्ज, नारायणगढ र धनगढी शाखा तथा देवः को केन्द्रीय कार्यालय, लालदरबार काठमाडौंबाट पनि भर्न सकिनेछ ।
हाल देवः को चुक्ता पुँजी १ अर्ब ६३ करोड ३२ लाख ७७ हजार १४८ रुपैयाँ छ । लिलामी सेयर बिक्रीपछि चुक्ता पुँजी २ अर्ब २८ करोड ६५ लाख ८८ हजार रुपैयाँ पुग्नेछ ।
बैंकले चालु आर्थिक वर्षको तेस्रो त्रैमासमा २० करोड २३ लाख ६६ हजार रुपैयाँ खुद नाफा कमाएको छ । प्रतिसेयर आम्दानी १६ रुपैयाँ ५२ पैसा (वार्षिक) रहेको देवःको प्रतिसेयर नेटवर्थ भने १४० रुपैयाँ ५७ पैसा छ ।
२०७५ असार ७ गते प्रकाशित
वि.सं.२०७५ असार ७ बिहीवार १२:३४ मा प्रकाशित