काठमाडौं । नेपाल बैंकले आजै (शुक्रबार) देखि १ करोड ७६ लाख ८४ हजार ८५८ कित्ता एफपीओ बिक्री खुला गरको छ । न्यूनतम ५० कित्तादेखि १० अंकले भाग जाने संख्यामा कानुनी सिमा भित्र रहेर अधिकतम सबै कित्ताका लागि आवेदन दिन पाउने बैंकले जानकारी दिएको छ । बैंकले अंकित मूल्य १०० रुपैयाँमा १८० रुपैयाँ प्रिमियम जोडेर प्रतिकित्ता २८० रुपैयाँमा एफपीओ बेच्न लागेको हो ।
एफपीओ भर्ने अन्तिम म्याद असार १९ गतेसम्म तोकिएको छ । यस अवधिमा सबै नबिकेमा भने साउन १३ गतेसम्म भर्न सकिनेछ । लगानीकर्ताले सी–आस्वाको माध्यमबाट सेयर भर्न सक्नेछन् । नेपाल बैंकले सरकारको हिस्सा ५१ प्रतिशत र सर्वसाधारणको ४९ प्रतिशत कायम गर्न एफपीओ जारी गर्न लागेको हो ।
एफपीओपछि बैंकको चुक्ता पुँजी ९ अर्ब ८१ करोड ११ लाख ४८ हजार रुपैयाँ पुग्नेछ । नेपाल बैंकलाई एफपीओ बिक्रीबाट प्रिमियमसहित ४ अर्ब ९५ करोड १७ लाख ६० हजार २४० रुपैयाँ प्राप्त हुनेछ । बैंकले यो रकमको ८५ प्रतिशत कर्जा तथा सापट, १० प्रतिशत लगानी, ३ प्रतिशत शाखा विस्तार र २ प्रतिशत अन्य काममा खर्च गरिने जनाएको छ ।
२०७५ असार १५ गते प्रकाशित
वि.सं.२०७५ असार १५ शुक्रवार ०९:३३ मा प्रकाशित
