काठमाडौं । कालिका पावर कम्पनीको आइपीओमा ८१ लाख ९६ हजार कित्ताका लागि आवेदन परेको छ । बिक्री प्रबन्धक ग्लोबल आइएमई क्यापिटलका अनुसार सोमबार ४ः३० बजेसम्म १ लाख १९ हजार जना आवेदकबाट ८१ लाख ९६ हजार कित्ताका लागि आवेदन परेको हो । यो माग भन्दा ६.८३ गुणा धेरै आवेदन हो । अन्तिम विवरण आउँदा आवेदक संख्या र रकम अझै बढ्नसक्ने बिक्री प्रबन्धकले जनाएको छ ।
कम्पनीले भदौ २८ गतेदेखि १२ लाख कित्ता आइपीओ बिक्री खुला गरेको हो । जसमा कुल सेयरमध्ये २४ हजार कित्ता कम्पनीका कर्मचारी र ६० हजार कित्ता सेयर म्युचुअल फन्डहरुलाई छुट्याएर बाँकी रहेको सेयर सर्वसाधारणलाई बिक्री गरेको हो । कम्पनीको आईपिओमा न्यूनतम ५० कित्तादेखि अधिकतम ६ हजार कित्ताका लागि आवेदन गर्न सकिने व्यवस्था छ । लगानीकर्ताले धितोपत्र बोर्डबाट आस्वा अनुमति लिएका बैंक तथा वित्तीय संस्थाहरुबाट आईपिओमा आवेदन गर्न सक्नेछन् । मेरो शेयरका प्रयोगकर्ताले इन्टरनेटको माध्यमबाट घरमै बसेर पनि शेयर आवेदन दिन सक्नेछन् ।
आवश्यक भन्दा बढी आवेदन परेकाले कम्पनीको शेयर गोलाप्रथाबाट दश कित्ता मोडलमा वाँडफाँड हुनेछ । कुल निष्कासन मध्ये २४ लाख रुपैयाँ बराबरको २४ हजार कित्ता कम्पनीका कर्मचारी र ६० लाख रुपैयाँ बराबरको ६० हजार कित्ता सामूहिक लगानी कोषलाई छुट्टाइएकोे छ । बाँकी रहेको ११ लाख १६ हजार कित्ता शेयर सर्वसाधारणलाई वितरण गरिनेछ ।
यसअघि कालिकाले गत माघ २१ देखि आयोजना प्रभावित गोरखाका स्थानीयबासिन्दालाई १० प्रतिशत अर्थात ६ करोड रुपैयाँ बराबरको ६ लाख कित्ता आईपिओ निष्कासन गरेको थियो । साधारण सेयर जारी गरेपछि कम्पनकिो चुक्ता पूँजी ६० करोड रुपैयाँ पुग्नेछ ।
२०७५ असोज २ गते प्रकाशित
वि.सं.२०७५ असोज २ मंगलवार ११:३४ मा प्रकाशित