काठमाडौं । शुभम पावर लिमिटडले सर्वसाधारणका लागि ५ करोड ८० लाख ५८ हजार रुपैयाँ बराबरको आईपिओ निष्काशन गर्ने भएको छ । कम्पनीले प्रतिकित्ता एक सय रुपैयाँ अंकित दरमा ५ लाख ८० हजार ५८० कित्ता आईपिओ जारी गर्ने माग गर्दै धितोपत्र बोर्डमा आवेदन गरेको छ ।
कम्पनीले यसअघि जेठ २० देखि असार २४ गतेसम्म संखुवासभा जिल्लाका आयोजना प्रभावित बासिन्दाका लागि २ लाख कित्ता आइपीओ बिक्री खुल्ला गरेको थियो । तर स्थानीय बासिन्दाले जम्मा १९ हजार ४२० कित्ताका लागि मात्र आवेदन दिएका थिए । नबिकेको १ लाख ८० हजार ५८० कित्तासमेत जोडेर अब सर्वसाधारणमा बिक्री खुल्ला गरिन लागेको हो ।
कम्पनीले शेयर निष्कासन तथा बिक्री प्रवन्धकमा सीबीआईएल क्यापिट लिमिटेडलाई तोकेको छ । कम्पनीको दुई चरणको आईपिओ पश्चात कम्पनीको चुक्तापूँजी २० करोड रुपैयाँ पुग्ने छ । जसमा संस्थापकको ७० र सर्वसाधारणको ३० प्रतिशत हिस्सा हुनेछ ।
कम्पनीको आईपिओलाई इक्रा नेपालले ग्रेड ५ रेटिङ प्रदान गरेको छ । सबैभन्दा कमजोर रेटिङ ग्रेड ५ प्राप्त गरेको कम्पनीले आय कर र सरकारलाई तिर्नुपर्ने रोयल्टीमा पनि छुट पाएको छ । कम्पनीले हाल संखुवासभा जिल्लामा ९९० किलोवाटको पिलुवाखोला जलविद्युत आयोजना सम्पन्न गरी २०६८ साउन १ गतेदेखि बिजुली उत्पादन गरिरहेको छ ।
२०७५ असोज ३ गते प्रकाशित
वि.सं.२०७५ असोज ३ बुधवार १३:४० मा प्रकाशित
