काठमाडौं । एउटै व्यक्तिले दोहोरो आवेदन दिएका कारण माथिल्लो तामाकोशी जलविद्युत आयोजनको आइपिओ बाँडफाँड पर धकेलिएको छ । सञ्चयकोषका बचतकर्ता, ऋणदाता संस्थाका कर्मचारी, आयोजना प्रभावित लगायतका लागि दुई पटक आईपिओ निष्काशन भएपनि तेस्रो पटक सर्वसाधारणलार्ई निकालिएको सेयरमा पनि तिनै आवेदकले दोहोरो आवेदन दिएका कारण धेरै समस्या आएको हो ।
आयोजनाको सेयर निष्काशन तथा बिक्री प्रबन्धक नागरिक लगानी कोष तथा सनराइज क्यापिटलले दोहोरो आवेदनका कारण सेयर बाँडफाँड प्रक्रियामा ढिलाइ भएको बताएका छन् ।
यसले गर्दा सेयर बाँडफाँड हुने समय पर धकेलिएको हो । अहिले पनि दोहोरो आवेदन गर्नेहरुको खोजी चलिरहेको छ । सोमबारसम्ममा ६ हजारभन्दा बढीको संख्यामा दोहोरो आवेदन गर्नेहरु फेला परेका छन् । अझै धेरै संख्यामा यस्ता आवेदकहरु भेटिने आँकलन गरिएको छ ।
दोहोरो आवेदन गर्नेहरुको आवेदन स्वतह रद्ध हुने सेयर निष्कासन तथा बिक्री प्रबन्धकहरुको भनाइ छ ।
माथिल्लो तामाकोशी आयोजनाले सर्वसाधारणलाई निष्काशन गरेको १ करोड ५० लाख ९० हजार ७५० कित्ता सेयरका लागि ३ लाख ४६ हजार बढीले आवेदन गरेका थिए । सबै आवेदनलाई अन्तिम रुप दिएर पछि मात्र सेयर बाँडफाँड गर्ने तयारीमा बिक्री प्रबन्धकहरुले रहेका छन् । यद्यपी मिति भने अझै तय गरिएको छैन ।
२०७५ मंसिर ४ गते प्रकाशित
वि.सं.२०७५ मंसिर ४ मंगलवार १०:२९ मा प्रकाशित