काठमाडौं । नेपाल र बंगलादेशबीचको ऊर्जा संयन्त्रको पहिलो बैठक आज बस्दै छ । बंगलादेशसँग ऊर्जा सहयोगसम्बन्धी सम्झौतामा हस्ताक्षर भएयता संयन्त्रको पहिलो बैठक बस्न लागेको हो ।
बैठक भोलीसम्म चल्नेछ । बैठकमा बंगलादेशको पावर मन्त्रालयका पावर डिभिजन हेर्ने सचिव अहमद वाइकाउस १३ सदस्यीय प्रतिनिधिमण्डलको नेतृत्व गरेका छन् भने नेपाली टोलीको नेतृत्व ऊर्जा, जलस्रोत तथा सिँचाइ मन्त्रालयका सचिव अनुपकुमार उपाध्यायले गरेका छन् । त्यसैगरी, सहसचिवस्तरीय संयुक्त कार्य समूहको बैठकसमेत बस्दैछ । उक्त बैठकमा नेपाली टोलीको नेतृत्व सहसचिव दिनेश घिमिरेले र बंगलादेशका तर्फबाट पावर डिभिजन हेर्ने सहसचिव शेख फैजुल अमिनले टोलीको नेतृत्व गर्दै छन् ।
बैठकमा क्रसबोर्डर इन्टरकनेक्सन सम्बन्धी छलफल हुनुका साथै विद्युत् व्यापारबारे समेत दुवै पक्षबीच वार्ता हुनेछ । त्यसैगरी, नवीकरणीय ऊर्जा क्षेत्रमा सहयोग, नेपालको जलविद्युत्मा बंगलादेशले लगानी गर्नेसम्बन्धी छलफल र जिएमआरबाट पाँच सय मेगावाट बिजुली बंगलादेशले खरिद गर्नेबारे समेत बैठकमा छलफल हुने बताइएको छ ।
ऊर्जामन्त्री पुनले गत सेप्टेम्बरमा गरेको बंगलादेश भ्रमणका बेला पनि दुवै देशबीच ऊर्जा क्षेत्रमा गर्न सकिने सहकार्यका विषयमा छलफल भएको थियो । मन्त्री पुनले त्यसका लागि छिट्टै संयन्त्रको बैठक बोलाउने र त्यसमा आगामी दिनमा गर्न सकिने सहकार्यका विषयमा छलफल गर्ने बताएका थिए ।
पुन ऊर्जामन्त्री भएपछि नै बंगलादेशसँग ऊर्जासम्बन्धी समझदारीपत्रमा हस्ताक्षर भएको थियो । काठमाडौंमा भएको उक्त समझदारीमा बंगलादेशका तर्फबाट ऊर्जा राज्यमन्त्री नसरुल हमिदले हस्ताक्षर गरेका थिए ।
ऊर्जामन्त्री पुनले नेपालको जलविद्युत् बंगलादेशलाई बेच्ने वातावरण आफूले बनाउने दाबी गर्दै आएका छन्। उनले नेपालमा उत्पादित बिजुली खपतका लागि आन्तरिक बजार बनाउनुका साथै क्षेत्रीय बजार निर्माणका लागिसमेत पहल गरिरहेका छन् । मन्त्री पुनकै पहलमा चीन र बंगलादेशसँग ऊर्जा सहकार्यमा हस्ताक्षर भएको थियो ।
२०७५ मंसिर १७ गते प्रकाशित
वि.सं.२०७५ मंसिर १७ सोमवार १०:५५ मा प्रकाशित