काठमाडौं । अर्थमन्त्री युवराज खतिवडाले पछिल्लो समय अत्याधिक मात्रमा ब्याजदर बढेको र त्यसले पार्ने प्रभावका सम्बन्धमा अध्ययन गर्न नेपाल राष्ट्र बैंकका डेपुटी गभर्नर शिवराज श्रेष्ठको संयोजकत्वमा एक समिति गठन गरेका छन् ।
समितिको सदस्यमा धितोपत्र बोर्डका अध्यक्ष रेवतवहादुर कार्की, बैंकर्स संघका अध्यक्ष ज्ञानेन्द्र ढुंगाना, सेयर लगानीकर्ता संघका प्रतिनिधि र अर्थ मन्त्रालयका वित्तीय क्षेत्र व्यवस्थापन हेर्ने सहसचिव छन् । समितिले मुद्रा तथा पुँजी बजारमा देखिएको समस्याबारे अध्ययन गर्नेछ । समितिले सात दिनभित्र अध्ययन गरी समाधानका सुझाव पेस गर्नेछ ।
उक्त समितिले आजैबाट काम थाल्ने भएको छ । वाणिज्य बैंकहरुले व्यक्तिगत निक्षेपको ब्याजदर चर्कोरुपमा बढाउन सुरु थालेपछि आर्थिक गतिविधि विस्तारमा समस्या आउने भन्दै सरकारले यसको समग्र अध्ययन गर्न समिति गठन गरेको हो ।
२०७५ मंसिर २१ गते प्रकाशित
वि.सं.२०७५ मंसिर २१ शुक्रवार ०९:५५ मा प्रकाशित
