काठमाडौं । राष्ट्रिय योजना आयोगका उपाध्यक्ष प्रा.डा. पुष्पराज कँडेलले धुनिबेशी क्षेत्रलाई काठमाडौंको वैकल्पिक शहरको रुपमा विकास गर्ने बताउनुभएको छ । राजधानीसंग जोडिएको सबैभन्दा नजिकको उपत्यका धुनिबेशी राष्ट्रिय आवश्यकता बमोजिम निकट भविष्यमा नयाँ शहरको रुपमा विकास गर्न उपयुक्त देखिएकोले आफुले पहलकदमी लिने बताउनुभयो ।
धुनिबेशीस्थित महेशधर्म मावि पूर्व विद्यार्थी समाज र धादिङ जिल्ल कुङ्ग फु संघद्वारा आयोजित साँस्कृतिक कार्यक्रममा उपाध्यक्ष कँडेलले बढ्दो शरीकरणका कारण काठमाडौं शहर विस्तार हुने क्रममा धुनिवेशी वैकल्पिक शहर बन्ने निश्चित भएकोले आवश्यक तयारी थाल्न नगरपालिकालाई निर्देशन दिनुभयो । धुनिबेशीका मेयर बालकृष्ण आचार्यलाई आवश्यक तयारी पुरा गरेर काठमाडौं आउन निर्देशन दिँदै उपाध्यक्ष कँडेलले शहरी विकास मन्त्रालयसंग समन्वय गरेर छिट्टै काम अगाडी बढाइने बताउनुभयो ।
कँडेलकै प्रस्तावमा धार्के सितापाइला सडकलाई वैकल्पिक राजमार्गमाम समावेश गर्दै यस वर्ष पहिलो प्राथमिकता प्राप्त आयोजनाको रुपमा यस वर्षको बजेटमा समावेश गरिएको छ । उपाध्यक्ष कँडेलको पहलमा सितापाइला भिमढुंगा गल्छी सडक पनि केन्द्रीय आयोजनामा समावेश भएको छ । लामो समयदेखि विवादित बन्दै आएको काठमाडौंको फोहोर विसर्जन गर्ने स्थान बञ्चरेडाँडा समेत उपाध्यक्ष कँडेलकै पहलमा निर्माण प्रकृया आरम्भ भएको छ । यी तीन वटै आयोजनाको स्थलगत निरिक्षण गर्दै उपाध्यक्ष कँडलले धुनिबेशी निकट भविष्यमै सबै सुविधासम्पन्न शहरको रुपमा विकास गर्न आवश्यक देखिएको बताउनुभयो ।
२०७६ जेठ २४ गते प्रकाशित
वि.सं.२०७६ जेठ २५ शनिवार १३:१४ मा प्रकाशित