काठमाडौं । गत आर्थिक वर्ष २०७५/०७६ मा सिद्धार्थ बैंकले २ अर्ब ३० करोड ८८ लाख रुपैयाँ खुद मुनाफा गरेको छ । आइतबार सार्वजनिक भएको बैंकको वित्तीय विवरणमा व्यवसायको विस्तार २० प्रतिशत माथि भएको छ।
जसबाट बैंकले ३६ प्रतिशतले ब्याज आम्दानी बढाउँदा नाफामा सहयोग पुगेको हो । कर्मचारी र अन्य सञ्चालक खर्चहरु ५० प्रतिशत माथि बढेपनि बैंकले अघिल्लो आर्थिक वर्षको तुलनामा मुनाफामा २१.२५ प्रतिशत वृद्धि गरेको हो ।
अघिल्लो आर्थिक वर्षमा बैंकले एक अर्ब ९० करोड ४१ लाख खुद नाफा आर्जन गरेको थियो । केन्द्रीय बैंकले तोकेको शिर्षकहरुमा नियामकीय व्यवस्था पश्चात बैंकको वितरण योग्य मुनाफा १ अर्ब ६५ करोड २० लाख रहेको छ । आठ अर्ब ८८ करोड चुक्ता पूँजी रहेको बैंकले यस नाफाबाट शेयरधनीलाई साढे १८ प्रतिशत लाभांश वितरण गर्नसक्ने छ ।
गत आर्थिक वर्षमा १ खर्ब १४ अर्ब ५३ करोड निक्षेप संकलनबाट १ खर्ब चार अर्ब ७६ करोड कर्जा लगानी गरेको बैंकले ४ अर्ब ६७ करोड ब्याज आम्दानी गरेको छ । यस्तै बैंकको आधार ब्याजदर ११.१६ बाट १०.७५ प्रतिशतमा, कोषको लागत ७.६३ बाट ७.५४ प्रतिशतमा र निष्कृय कर्जा अनुपात १.०९ बाट ०.७५ प्रतिशतमा झरेको छ ।
कुल ६ अर्ब २० करोड बराबरको जगेडा रकम रहेको बैंकको जगेडा कोषमा ४ अर्ब ४१ करोड, शेयरधनी कोषमा १ अर्ब ६६ करोड र १२ करोड शेयर प्रिमियम रहेको छ ।
२०७६ साउन १९ गते प्रकाशित
वि.सं.२०७६ साउन १९ आइतवार १२:२२ मा प्रकाशित