Logo

किन सुस्तायो सुनको व्यापार ? देशभर मुश्किलले १० केजीमात्र कारोवार

काठमाडौं । सुनको मूल्य धमाधम आकाशिँदै गएपछि कारोबार सुस्त हुदैँ गएको छ । बढि कारोवार हुने साउन महिना र तीज नजिकिँदा पनि देशभरका सुनचाँदी पसलहरू लगभग सुनशान नै देखिन्छन ।

पसलमा गरगहना किन्नेभन्दा विक्री गर्ने ग्राहक बढी आउन थालेपछि सुनको कारोवार उल्टो भइरहेको छ ।  अन्तरराष्ट्रिय बजारमा नै सुनको मूल्य बढेपछि नेपालमा पनि यसको मूल्य बढेको हो । अहिले नेपाली बजारमा प्रतितोला छापावाल सुनको मूल्य ७० हजार रुपैयाँ छ । जुन साउन २४ गतेदेखि स्थिर छ ।

मुल्य घट्ने छाँटकाँट देखिएको छैनन तर सामान्य अवस्था आउँदा पनि प्रतितोला ६५ हजार रुपैयाँ भन्दा तल नझर्ने संकेत छ । साउन महीनामा मात्र सुनको मूल्य तोलामा ५ हजार ५०० बढेको छ । महासंघका अनुसार साउन १४ गतेसम्म सुनको मूल्य प्रतितोला ६५ हजार रुपैयाँमा घटवढ हुँदै आएको थियो । साउन १५ देखि २३ गतेसम्म लगातार बढेको थियो । अहिले ७० हजार रुपैयामा स्थिर छ ।

कारोबार कम भएपछि सुनचाँदी व्यवसायीहरूले बैंकबाट सुन किन्न बन्द गरेका छन् । अहिले नेपाली बैंकहरूमा ७३० केजीभन्दा बढी सुन थन्किएको छ । सुन आयात गरेर व्यवसायीलाई विक्री गर्ने अधिकार वाणिज्य बैंकहरूसँग मात्रै छ । कारोबार घटेपछि बैंकहरूमा सुन जम्मा हुँदै गएको छ ।

नेपाल सुनचाँदी व्यवसायी महासंघका अनुुसार देशभरका २२ हजार सुनचाँदी पसलमा यो मौसममा दैनिक ४० केजीसम्म सुन बेचबिखन गरेपनि अहिले मुश्किलले १० केजी सुनको मात्र कारोबार हुने गरेको छ ।

२०७६ साउन २८ गते प्रकाशित

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com