Logo

मोबाइल एपबाट ट्याक्सी सेवा दिँदै, ‘यात्रु’ फोन, एसएमएस र एपबाटै अर्डर

काठमाडौं ।  काठमाडौं उपत्यकाको ट्याक्सी सेवा व्यवस्थित र मर्या्दित बनाउन ‘यात्रु’ले अनलाइन ट्याक्सी सेवा शुरू गर्ने भएको छ ।

फोन, एसएमएस र मोबाइल एपको माध्यमबाट ट्याक्सी बोलाउन मिल्नेगरी यात्रुले सेवा दिन लागेको हो । आगामी आइतवारदेखि उपत्यकामा परीक्षणका रूपमा फोन र एसएमएसको माध्यमबाट उक्त सेवा शुरू गर्न लागिएको कम्पनीले बताएको छ । त्यसको १ महीनाभित्र मोबाइल एपबाट समेत सेवा सञ्चालन गर्ने उसको तयारी छ ।

हालसम्म कम्पनीमा उपत्यकाका १ हजारभन्दा बढी ट्याक्सी व्यवसायीरचालक आबद्ध भइसकेका छन् । आगामी २ महीनाभित्र उपत्यकाका २ हजारभन्दा बढी ट्याक्सी व्यवसायीलाई आबद्ध गर्ने लक्ष्य कम्पनीको छ । कम्पनीमा अनिल चौधरी, राजु चौधरी र राजीव बम्जन संस्थापकका रूपमा छन् । तीनैजना म्यानेजमेन्टका विद्यार्थी हुन् ।

यसमा आबद्ध हुने ट्याक्सी चालकसँग भाडाको १० देखि २० प्रतिशत लिइने कम्पनीले बताएको छ । बाँकी रकम चालकको आफ्नै हुनेछ । यात्रुमा आबद्ध हुनुअगावै कम्पनीले ट्याक्सी चालकलाई प्राविधिक लगायत विषयमा तालीम दिनेछ । उक्त तालीममा उनीहरूलाई ग्राहकसँग गर्ने व्यवहार र पिकअप तथा ड्रप गर्ने तरीका सिकाइनेछ ।

यात्रुमा तत्काललाई मोबाइल एपको सुविधा भने हुनेछैन । सञ्चालनमा ल्याउन लागिएको एप अहिले परीक्षणकै क्रममा रहेको चौधरीले बताए । ‘यात्रुको सुरक्षालाई प्राथमिकतामा राखेका छौं,’ उनले भने, ‘स्तरीय सेवा दिन प्रतिबद्ध छौं ।’
पछिल्लो समय विश्वमा अनलाइनको माध्यमबाट व्यवस्थित ट्याक्सी सेवा सञ्चालन भइरहँदा नेपालमा पनि त्यसको प्रत्यक्ष प्रभाव परेको देखिन्छ ।

ग्राहकले फोन, एसएमएस र मोबाइल एपको माध्यमबाट ट्याक्सी अर्डर गर्छन् । उक्त तीनमध्ये जुनसुकै माध्यमबाट अर्डर गरे पनि कम्पनीले त्यसको निक्र्योलका लागि सम्बन्धित ग्राहकको मोबाइल नम्बरमा फोन गर्छ । यसरी कम्पनीले ट्याक्सी अर्डर गरेको स्थान र गन्तव्यसम्बन्धी जानकारी लिन्छ । त्यसपछि सेवाबापत लाग्ने शुल्कबारे बताउँछ ।

ग्राहकले शुल्क बुझेपछि सेवा लिन चाहेमा वा अर्डर गरेको स्थानदेखि १ किलोमिटर आसपास यात्रुको ट्याक्सी भएमा मात्र अर्डर स्वीकृत हुन्छ । ग्राहकले भनेको स्थान नजीक ट्याक्सी उपलब्ध नभए अर्डर नलिइने व्यवस्था कम्पनीले गरेको छ । उपत्यकामा जामको समस्याले योभन्दा बढी दूरीको अर्डर लिन नसकिएको कम्पनीले बताएको छ । अर्डरपछि ट्याक्सी जाममा परे ग्राहकले धेरै समय पर्खनुपर्ने समस्या आउन नदिन उक्त व्यवस्था गरेको हो । (आर्थिक अभियानबाट)

२०७६ साउन २८ गते प्रकाशित

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com