हेटौँडा। हेटौँडा सिमेन्ट उद्योगमा भट्टीको फायर ब्रिक्स् खसेपछि उद्योग आठ दिन सम्म ठप्प भएको छ । सरकारी स्वामित्वमा रहेको सिमेन्ट उद्योग आठ दिन बन्द हुँदा तीन करोड ८४ लाख घाटा भएको छ । एकदिन मात्र उद्योग बन्द हुँदा ४८ लाख घाटा हुने गरेको उद्योग प्रशासनले जनाएको छ ।
खसेर बिग्रिएको फायर ब्रिक्स् मर्मतपछि उद्योग पुनः सञ्चालनमा आएको छ । किल ब्रिक्स् लाइनिङको काम सकिएपछि शुक्रबारबाट भट्टी तताउन शुरु गरिएको थियो भने विस्तारै उत्पादन शुरु भएको उद्योगका नायब महाप्रबन्धक कामेश्वर मण्डलले जानकारी दिनुभयो । करीब २० लाखको लगानीमा फायर ब्रिक्स लाइनिङ गरिएको उद्योगले जनाएको छ । एउटा ब्रिक्स्को तौल साढे १० किलोको हुने गरेको छ ।
उद्योगमा यसपटक दुई हजार छ सय वटा ब्रिक्स लाइनिङ गरिएको र एउटा ब्रिक्सकै मूल्य रु ७०० पर्ने मण्डलले बताउनु भयो । दैनिक १६ हजार बोरा सिमेन्ट उत्पादन गर्ने क्षमता रहेको उद्योगले हाल दैनिक औसत आठ हजार बोरा मात्र सिमेन्ट उत्पादन गरिरहेको छ । करीब ३१ लाख बोरा सिमेन्ट उत्पादन गर्ने क्षमता रहेको उद्योगले गत आर्थिक वर्षमा २० लाख बोरा मात्र सिमेन्ट उत्पादन गर्न सकेको उद्योगका प्रशासन महाशाखा प्रमुख गणेश कोइरालाले जानकारी दिनुभयो ।
उद्योगको यन्त्रमा पटक पटक खराबी आएर उद्योग बन्द हुँदा उत्पादनमा ह्रास आएको र आव २०७४/७५ को तुलनामा झण्डै आठ लाख बोरा सिमेन्ट उत्पादन घटेको उद्योगले जनाएको छ। तर यसका धेरैजसो यन्त्रहरु बनाइएको छ । जसका कारण यस आवमा भने उत्पादन बढ्न सक्ने अनुमान गरिएकोछ ।
२०७६ भदौ २ गते प्रकाशित
वि.सं.२०७६ भदौ २ सोमवार १३:१० मा प्रकाशित
