काठमाडौं । सिन्धुलीको कमलामाई नगरपालिकाले ९ महिनामा ५ सय पशुलाई सुत्केरी भत्ता वितरण गरेको छ । गत आर्थिक वर्ष ०७५/७६ मा ५ सय गाई भैँसीलाई सुत्केरी भत्ता वितरण गरेको नगरपालिकाले जनाएको छ ।
नगरपालिकाले २०७५ मंसिर १ गतेदेखि ब्याएका गाईभैँसीलाई सुत्केरी खाद्यान्न सहयोग स्वरुप नगद १ हजार रुपैयाँ भत्ता दिन सुरु गरिएको हो ।
नगरपालिकाले ५ सय पशुलाई नै भत्ता दिने लक्ष्य राखिए अनुसार नै वितरण भएको जनाएको छ । नगरपालिकाले गत आवमा पुश सुत्केरी भत्ताका लागि ५ लाख रुपैयाँ विनियोजन थियो ।
किसानहरूबाट सुत्केरी पशुको भत्ता दिन निवेदन सङ्कलन गरेर असार मसान्तसम्ममा ५ सय वटा सुत्केरी पशुलाई सुत्केरी भत्ता वितरण गरेको हो ।
कार्यालयमा संकलन भएका निवदेनका आधारमा एक हजारका दरले ५ लाख रुपैयाँ सुत्केरी भत्ता वितरण गरेको नगरपालिकाले जानकारी दिएको छ ।
किसानले पशुको सुत्केरी भत्ता लिन वडा कार्यालयको सिफारिस, पशुधनी र ब्याएको गाईभैँसीको बच्चासहित देखिने फोटो र नागरिकताको प्रतिलिपि सहितको निवेदन नगरपालिकामा दर्ता गर्नु पर्ने व्यवस्था गरिएको छ ।
२०७६ भदौ ६ गते प्रकाशित
वि.सं.२०७६ भदौ ६ शुक्रवार ०७:३२ मा प्रकाशित
