Logo

यसकारण बन्दै छ सेयर खरिद बिक्री गर्न झन–झन् कठिन (तथ्य सहित)

काठमाडौं । आन्तरिक र बाह्य कारणले केही वर्षयता सेयर बजार कारोबारमा खरिद–बिक्री गर्न झन–झन् गाह्रो पर्दै गएको छ । सेयर बिक्रीको सहजता देखाउने ‘अनुपात सूचक’ झन्–झन् ओरालो लागेकाले सेयर कारोबार कठिन हुँदै गएको देखिएको हो ।

दुई वर्षअघि आर्थिक वर्ष ०७३/७४ मा सेयर कारोबार अनुपात १५.४९ प्रतिशत थियो । आव ०७५/७६ मा यो सूचक घटेर ९.८० प्रतिशतमा सीमित भएको छ ।

आव ०७४/७५ मा भने यस्तो सूचक ८.९५ थियो । ‘यो सूचक दुई वर्षयता घटेको देखिए पनि समग्रमा एसियाली मुलुकसँगको तुलनामा औसतमै छौँ,’ नेपाल स्टक एक्सचेन्जका कायममुकायम प्रबन्धक निरञ्जन फुँयालले भन्नुभयो ।

घट्दो बजारमा यस्तो सूचक घट्नु सामान्य नै मानिन्छ । नेपालको यस्तो सूचक अन्य मुलुकसँगको तुलनामा भने कमजोर नै छ ।

‘यो सूचकले बजारको समग्र पक्षलाई हेर्दैन,’ सेयर विश्लेषक प्रकाश तिवारी भन्छन्, ‘तर यसले कुनै पनि मुलुकको सेयर बजार कति प्रभावकारी चलेको छ भन्ने देखाउँछ ।’

यस्तो सूचक उच्च भएको मुलुकहरूका बजारमा सेयर तरल (किनबेच गर्न सजिलो) रहेको मानिन्छ । त्यस्तै, त्यस्ता मुलुकका बजारमा वित्तीय उपकरणहरूको उपलब्धता भएको र लगानीकर्ता सूचित रहेकोसमेत मानिन्छ ।

विश्व बैंककै तथ्यांकअनुसार इटालीको सूचक ३ सय ५० प्रतिशत छ । टर्कीको यस्तो सूचक २ सय ४७, बेलायतको १ सय ४६ र अमेरिकाको १ सय ८ प्रतिशत छ । नयाँ पत्रिका दैनिकमा समाचार छ ।

२०७६ भदौ २६ गते प्रकाशित

प्रतिक्रिया दिनुहोस्


कार्यालय : लाजिम्पाट २, काठमाडौँ
नेपाल

© 2018 All Right Reserved Arthatantra News
DEVELOPED BY appharu.com