काठमाडौं । सरकार स्वामित्वको नेपाल विद्युत प्राधिकरणले २५ प्रतिशत साधारण सेयर (आईपीओ) निष्कासन गर्ने भएको छ । प्राधिकरणलाई कम्पनी मोडेलमा लगेर सर्वसाधारणलाई आईपीओ निष्कासन गर्न लागेको हो ।
प्राधिकरणले नाफा गर्न थालेकाले २५ प्रतिशत आईपीओ निष्कासनको प्रस्ताव गरिने कार्यकारी निर्देशक कुलमान घिसिङ्ले बताउनुभयो । उहाँले आईपीओ निष्कासनका लागि प्राधिकरणको सम्पत्ति मूल्याँकन काम सुरु गरिने जानकारी दिनुभयो ।
गत आर्थिक वर्षमा ७ अर्ब ३० करोड रुपैयाँ नाफा गरेको प्राधिकरणले चालु आर्थिक वर्षमा ८ अर्ब ५० करोड रूपैयाँ नाफाको प्रक्षेपण गरेको छ ।
नाफा बढेपछि प्राधिकरणको सञ्चित नोक्सानी घटेर १५ अर्ब रुपैयाँमा झरेको छ । बिजुली चुहावट २५ बाट घटेर १५ प्रतिशतमा झरेको छ ।
प्राधिकरणले चुहावट घटाएर नाफा बढाउने लक्ष्य लिएको छ । गत वर्ष प्राधिकरणले ७३ अर्ब ४६ करोड रुपैयाँको कारोबार गरेको थियो । प्राधिकरणले स्थापना गरेका सहायक कम्पनीहरुले धमाधम आईपीओ निष्कासन गरिरहेका छन ।
२०७६ भदौ २९ गते प्रकाशित
वि.सं.२०७६ भदौ २९ आइतवार १६:१५ मा प्रकाशित