काठमाडौं । नेप्से परिसूचक पछिल्लो ८ कारोबार दिनदेखि निरन्तर ओरालो लागिरहेको छ । सोमबारसहित नेप्से ८ दिनमा ७० दशमलव ९३ अंक घटेको छ ।
लगानीकर्ताको मनोबल घटेसँगै बजार निरन्तर ओरालो लागेको हो । नेप्से परिसूचकसँगै नेप्सेको १४ दिने आरएसआई पछिल्लो ६ कारोबार दिनदेखि ओभरसोल्ड जोनमा रहेको छ ।
प्राविधिक विश्लेषण अनुसार बजारमा बिक्री चाप बढी भएको देखिए पनि बजारमा बिक्री गर्ने लगानीकर्ता कम रहेको छ । बजार निरन्तर ओरालो लाग्दा पनि नियामक निकायले लगानीकर्ताको मनोबल बढाउन केही कार्यक्रम सञ्चालन नगरेका कारण बजारले सकारात्मक दिशा नलिएको एक लगानीकर्ताले बताए ।
कम्पनीहरूले नाफामूलक वित्तीय विवरण सार्वजनिक गरी लाभांश घोषणा गरिसकेका छन । यस्तो अवस्थामा पनि बजार नबढ्नु भनेको लगानीकर्ताको कमजोर मनोबल नै रहेको उनको भनाइ छ ।
नेप्से परिसूचक सोमबार १६ दशमलव १८ अंक घटेर १ हजार १ सय २३ दशमलव ८३ बिन्दुमा पुगेको छ । सेन्सेटिभ इन्डेक्स यस दिन ३ दशमलव ६६ अंक घटेर २ सय ४६ दशमलव ३५ बिन्दुमा पुगेको छ ।
त्यसैगरी, फ्लोट इन्डेक्स यस दिन १ दशमलव शून्य ९ अंक र सेन्सेटिभ फ्लोट इन्डेक्स १ दशमलव शून्य ४ अंक घटेको छ ।
यस दिन १ सय ६९ कम्पनीको ७ हजार ५ सय ४७ पटकको कारोबारमा ३४ करोड ३९ लाख १८ हजार २ सय २१ रुपैयाँबराबरको १२ लाख ४८ हजार ४ सय ९ कित्ता सेयर खरिद–बिक्री भएको छ ।-नयाँ पत्रिकाबाट
२०७६ भदौ ३१ गते प्रकाशित
वि.सं.२०७६ भदौ ३१ मंगलवार ०९:१८ मा प्रकाशित