एजेन्सी । जापानमा ६० वर्ष यताकै शक्तिशाली आँधी आउँदा कम्तीमा ९ जनाको मृत्यु भएको छ ९० जना भन्दा बढि घाइते हुनुका साथै केही मानिसहरु हराइरहेका छन् । शनिवार शक्तिशाली आँधीसँगैको वर्षा र पहिरोका कारण जापानको प्रायसः स्थानको जनजीवन प्रभावित भएको छ ।
हगिबास नामक आँधीले स्थानीय समय अनुसार साँझ ७ बजे जापानी तटलाई हानेसँगै उक्त आँधिले वर्षा र पहिरो निम्त्याएको अन्तर्राष्ट्रिय न्यूज एजेन्सीहरुले जनाएका छन् । बाढीले घर बगाउँदा टोमिकोमा १ पुरुष र टोकियो नजिकैको सागामिहारामा एक महिलाको ज्यान गएको छ । त्यस्तै कावासकीको अपार्टमेन्ट, टोचिगी र चिवामा १/१ जनाको ज्यान गएको बीबीसी समाचारमा लेखिएको छ । आँधीका कारण ९० भन्दा बढी मानिस घाइते हुनुका साथै ११ जना बेपत्ता भएको समाचार छ । घाइतेहरुको उद्धार गरि उपचार भइरहेको छ ।
करिब पाँच लाख मानिस प्रभावित हुने गरी बिजुली काटिएको छ । हगिबिस नामको शक्तिशाली आँधी अहिले उत्तरतिर बढिरहेको छ र समुद्रतिरै फर्कने ठानिएको छ । २२५ कि.मि. प्रति घण्टाको दरमा अगाडि बढेको इगु प्रायद्वीपबाट सुरु आँधी अहिले पूर्वी तटमा रहेको जापानको मुख्य टापु तर्फ अगाडि बहिरहेको छ । सत्तरी लाख भन्दा बढी मानिसलाई भयानक बाढी र पहिरोको चेतावनीका बीच घर छोड्न भनिएतापनि ५० हजार मात्र सुरक्षित शिविरमा बसेका समाचारहरूमा जनाइएको छ ।
जापानी बुलेट ट्रेन सेवा रोकिएका छन् । टोक्योको मेट्रो सर्भिस पनि शनिवार दिनभर जसो रोकिएको थियो । टोक्योको हानेडा विमानस्थल र चीबास्थित नारिटा विमानस्थलका गरि करिब एक हजार सबै उडानहरू रद्द गरिएका छन् ।
सहर तथा गाउँमा आँधी सँगै भारी वर्षा भइरहेको र यो क्रम केही समय जारी रहने सरकारी अधिकारीहरूले बताएका छन् । जेएमएका यासुसी कजिवाराले सम्भावित क्षति हुन नदिन आपतकालील चेतावनी जारी गरिएको जनाएका छन् ।
गत महिना मात्रै टाइफुन फक्साइले जापानका केही भागमा विध्वंस मच्चाउँदा ३० हजार घरहरूमा क्षति पुगेको थियो, ती मध्ये धेरै घरहरू अझ पनि मर्मत सम्भार गरिएको छैन ।
२०७६ असोज २६ गते प्रकाशित
वि.सं.२०७६ असोज २६ आइतवार ११:४४ मा प्रकाशित
