काठमाडौं । ९ जलविद्युत् आयोजनाले सर्वसाधारणबाट लगानी जुटाउन २ अर्ब १३ करोड रुपैयाँको प्राथमिक सेयर निष्कासन गर्ने तयार गरेका छन ।
यी कम्पनी धितोपत्र बोर्डमा सेयर निष्कासन अनुमति माग्ने प्रक्रियामा छन । माउन्टेन इनर्जी नेपाल, युनाइटेड इद मार्दी एन्ड आरबी हाइड्रोपावर, लिबर्टी इनर्जी कम्पनी, ग्रिनलाइफ हाइड्रोपावर, सिंगटी हाइड्रो इनर्जी, हिमालयन हाइड्रोपावर, तेह्रथुम पावर जलविद्युत, सुभम पावर र मैलुङखोला जलविद्युत् कम्पनी अनुमति प्रक्रियामा छन ।
लिवर्टी इनर्जी कम्पनी र ग्रिन लाइफ हाइड्रोपावर लिमिटेड भने स्वीकृतिको अन्तिम चरणमा छन। सिंगटी हाइड्रोपावर कम्पनी र सेयर प्रत्याभूतिकर्ता (अन्डरराइटर) बीच सामान्य विवाद देखिएकाले कम्पनीको अनुमति प्रक्रिया लम्बिरहेको छ ।
मैलुङ खोला जलविद्युत् कम्पनीले धितोपत्र बोर्डमा सेयर निष्कासनका लागि आवेदन दिएकै दुई वर्ष पुगिसकेको छ । कम्पनीले जेठ ०७४ मै स्थानीयलाई करिब ३ लाख ६८ हजार कित्ता सेयर जारी गरेको थियो ।
सो समय कम्पनीले रेटिङ कम्पनी इक्रा नेपालबाट ग्रेड फोर रेटिङ पाएको थियो । यो रेटिङले पनि कम्पनीको आधारभूत पक्ष औसतभन्दा कमजोर रहेको संकेत गर्छ ।
तर, हाल कम्पनीले ग्रेड ५ रेटिङ पाएको छ । यसले आधारभूत पक्ष खराब रहेको संकेत गर्छ । यही कारण कम्पनीलाई सेयर जारी गर्न दिने नदिनेमा विभाग र बोर्डबीच दुविधा देखिएको छ ।
ग्रेड ५ रेटिङ पाएमा कम्पनीहरूले सेयर निष्कासनको अनुमति नपाउने व्यवस्था छ । तर, स्थानीयलाई सेयर जारी गरिसकेका कारण भने मैलुङलाई सेयर जारी गर्नबाट नरोक्ने पक्षमा धितोपत्र बोर्ड छ ।
‘विभागलाई अहिलेको अवस्थामा सेयर जारी प्रक्रियालाई रोक्न नमिल्ने हामीले स्पष्ट पारेका छौँ,’ धितोपत्र बोर्डका कार्यकारी निर्देशक तथा प्रवक्ता निरज गिरीले भने, ‘उहाहरूले अब चाँडै नै अनुमति दिनुहोला ।’
विभाग र बोर्डबीच यस विषयमा छलफल भइरहेकाले ढिलाइ हुँदै आएको थियो । अब भने मैलुङले विभागबाट समेत अनुमति पाउने सम्भावना बढेको छ ।
हेर्नुहोस् सूचि :
२०७६ मंसिर ३० गते प्रकाशित
वि.सं.२०७६ मंसिर ३० सोमवार ०९:२१ मा प्रकाशित
