काठमाडौं । सोमवार नेप्से परिसूचक घटेर बन्द भएको छ । आइतवार ३३ दशमलव ४३ अंक बढेर बन्द भएको परिसूचक यस दिन भने २६ दशमलव ५४ अंक घटेर १ हजार ३१७ दशमलव ११ विन्दुमा पुगेर बन्द भएको हो ।
यस दिन १ हजार ३४२ दशमलव ७० विन्दुबाट शुरु भएको कारोबारको पहिलो १५ मिनेटको समयमा बढेर १ हजार ३५९ को विन्दु सम्म पुगेको थियो । सो विन्दुपछि विक्रीकर्ताहरु हावी हुँदा नेप्से परिसूचक ओरालो लागेको हो ।विश्लेषकहरू निरन्तर सूचक बढेका कारण ’करेक्सन’ आएको बताउँछन
गत कारोबार दिनदेखि उकालो लागेको बजारको फाइदा अल्पकालिन लगानीकर्ताहरुले उठाएका छन् । सोमवार कारोबारमा आएका १२ समूहकै परिसूचक घटेर बन्द हुँदा समग्र नेप्से परिसूचक १ दशमलव ९८ प्रतिशत घट्न पुगेको छ ।
कारोबार अवधिभर व्यापार समूहको परिसूचक सर्वाधिक ६ दशमलव ३४ प्रतिशत घटेको छ । यस्तै होटल, जलविद्युत् र वित्त समूहको परिसूचक ३ प्रतिशतभन्दा बढी घटेर बन्द भएको छ ।
विकास बैंक, निर्जीवन बीमा, उत्पादन तथा प्रशोधन, लघुवित्त र जीवन बीमा समूहको परिसूचक २ प्रतिशतभन्दा बढी बढेका छन् भने बैंकिङ, ‘अन्य’ र म्युचुअल फन्ड समूहको परिसूचक १ प्रतिशतभन्दा बढी घटेको छ ।
सोमवार १ अर्ब ९७ करोडको कारोबार
घटेर बन्द भएको बजारमा कारोबार अवधिभर रू.१ अर्ब ९७ करोड ३ लाख बराबरको शेयर खरीदविक्री भएको छ ।यो अघिल्लो कारोबार दिनको तुलनामा ५ दशमलव ७६ प्रतिशत घटेको हो ।
गत कारोबार दिन आइतवार रू.२ अर्ब ९ करोड ८ लाख रकम बराबरको कारोबार भएको थियो । सेन्सेटिभ इन्डेक्स यस दिन ४ दशमलव ८६ अंक घटेर २८३ दशमलव ५३ विन्दुमा पुगेर बन्द भएको छ ।
चार कम्पनीको शेयरमूल्यमा सर्किट
सोमवारको कारोबारमा चार कम्पनीको शेयरमूल्य सर्वा्धिक बढेर कारोबार हुँदा सर्किट लागेको छ । शेयरमूल्य बढेर सकारात्मक सर्किट लाग्नेमा मल्टीपर्पस फिनांस र ग्लोबल आइएमई बैंक रहेका छन् भने शेयरमूल्य घटेर नकारात्मक सर्किट लाग्नेमा पाँचथर पावर कम्पनी र पोखरा फाइनान्स रहेका छन् ।
ग्लोबल आइएमई बैंकको मर्जर पश्चात सोमवार देखि २५२ दशमलव ४७ रुपैयाँमा पहिलो कारोबारको लागि ओपनिङ रेञ्ज खोलेको थियो ।
हिमालयन डिस्टिरलीको सर्वा्धिक कारोबार
सोमवार हिमालयन डिस्टिलरीको सर्वा्धिक शेयर कारोबार भएको छ । कम्पनीको १ लाख ६३ हजार १२५ कित्ता शेयरको खरीदविक्री हुँदा रू.२० करोड ९२ लाख बराबरको शेयर कारोबार भएको छ । कम्पनीको शेयरमूल्य भने प्रतिकित्ता रू.१ हजार २८० कायम छ ।
कारोबार रकमकै आधारमा दोस्रोमा नेपाल क्रेडिट एण्ड कमर्शियल बैंकको रू.१३ करोड ३२ लाख बराबरको शेयर कारोबार भएको छ । कम्पनीको शेयरमूल्य प्रतिकित्ता रू.२३३ मा सिमित रहेको छ ।
यस दिन कारोबारमा आएका १८२ कम्पनीमा १५ कम्पनीको शेयरमूल्य बढेको छ भने १६४ कम्पनीको घटेको छ । साथै ३ कम्पनीको शेयरमूल्य भने स्थिर रहेको छ ।
वि.सं.२०७६ माघ ६ सोमवार १६:४० मा प्रकाशित