काठमाडौं । सरकारी स्वामित्वको नेपाल बैंकको खुद नाफा गत आर्थिक वर्षको दोस्रो त्रैमासको तुलनामा चालु आर्थिक वर्षको सोही अवधिमा ३० करोड ९१ लाख रुपैयाँ अर्थात १८.६० प्रतिशत घटेको छ ।
गत आर्थिक वर्षको पुस मसान्तसम्ममा १ अर्ब ६६ करोड १४ लाख खुद नाफा आर्जन गरेको यस बैंकले चालु आर्थिक वर्षको सोही अवधिमा १ अर्ब ३५ करोड २३ लाख नाफा कमाएको छ। बैंकले चालु आर्थिक वर्षको पहिलो त्रैमासमा पनि खुद नाफा घटेका वित्तीय विवरण प्रकाशित गरेको थियो ।
गत आवमा ३८ करोड असुली हुनु, निक्षेप सङ्कलन लागत कम र राष्ट्र बैंकले स्प्रेडदरमा कडाई नगरेका कारण सो अवधिमा बैंकको नाफा बढेको बैंकका अध्यक्ष बासुदेवले अधिकारीले बताएका थिए ।
चालु आवमा भने स्प्रेड दरमा राष्ट्र बैंकले गरेको कडाई, निक्षेप लागत बढ्नु र पुरानो असुली नहुँदा खुद नाफा घटेको उनको भनाई थियो । दोस्रो त्रैमासमा बैंकले नियमित आम्दानी र खराब कर्जाबाट पुरानो असुली हुँदा बैंकको मुनाफामा सुधार आउने उनले बताएका थिए । तर, सो अनुसारको सुधार भने दोस्रो त्रैमासिक वित्तीय विवरणमा देखिएको छैन ।
पुस मसान्तसम्ममा बैंकको निक्षेप सङ्कलन, खुद ब्याज आम्दानी, सञ्चालन मुनाफा पनि घटेको छ । बैंकको कर्जा विस्तारमा सामान्य सुधार भएको छ भने कष्ट अफ फण्ड १.६१ प्रतिशत विन्दुले बढेको छ । सो अवधिसम्ममा बैंकको निष्क्रिय कर्जा २.७४ प्रतिशतबाट घटेर २.६६ प्रतिशतमा सीमित भएको छ ।
९ अर्ब ८१ करोड ११ लाख रुपैयाँ चुक्ता पूँजी रहेको यस बैंकको जगेडा कोषमा १३ अर्ब ५२ करोड ११ लाख रुपैयाँ, शेयरधनी कोषमा २ अर्ब ५९ लाख ८२ हजार रुपैयाँ र शेयर प्रिमियममा ३ अर्ब २६ करोड २८ लाख रुपैयाँ रहेको छ ।
सो अवधिसम्ममा १ खर्ब १७ अर्ब १२ करोड निक्षेप सङ्कलन गरेको यस बैंकले ९८ अर्ब ४५ करोड ९६ लाख रुपैयाँ कर्जा परिचालन गरी २ अर्ब ७४ करोड ५० लाख रुपैयाँ खुद ब्याज आम्दानी गरेको छ ।
यो गत आर्थिक वर्षको सोही अवधिको तुलनामा ४१ करोड ३१ लाख रुपैयाँ कम हो । समीक्षा अवधिमा बैंकको सञ्चालन मुनाफा ५७ करोड ७८ लाख रुपैयाँ घटेर १ अर्ब ७३ करोड ४६ लाख रुपैयाँमा झरेको छ ।
पुस मसान्तसम्ममा ६८ करोड ३७ लाख रुपैयाँ वितरण योग्य मुनाफा रहेको यस बैंकको प्रतिशेयर आम्दानी २७ रुपैयाँ ५७ पैसा रहेको छ । यो १५ प्रतिशत बोनस शेयर पूँजीकरण नगरिएको प्रतिशेयर आम्दानी हो। १५ प्रतिशत बोनस शेयर पूँजीकरणपश्चात बैंकको प्रतिशेयर आम्दानी २३ रुपैयाँ ९७ पैसा कायम हुनेछ । गत आवको पुस मसान्तसम्ममा बैंकको प्रतिशेयर आम्दानी ३३ रुपैयाँ ८७ पैसा रहेको थियो ।
त्यसैगरी, हाल बैंकको मूल्य आम्दानी अनुपात १०.०५ गुणा रहेको छ भने बोनस पूँजीकरणपश्चात बैंकको मूल्य आम्दानी अनुपात ११.५६ गुणा हुनेछ । बैंकको प्रतिशेयर नेटवर्थ २९७ रुपैयाँ ५५ पैसा रहेको वित्तीय विवरणमा उल्लेख छ ।
२०७६ माघ १४ गते प्रकाशित
वि.सं.२०७६ माघ १४ मंगलवार ०९:३५ मा प्रकाशित
