काठमाठौँ । एडभेन्चर इन न्यू इरा (नयाँ युगमा साहसिक पर्यटन) नाराका साथ आयोजित मार्टमा साहसिक यात्रा तथा पर्यटन क्षेत्रको विविधता, चुनौती एवं अवसरका बारेमा यहाँ छलफल गरिएको छ ।
यही फेब्रुअरी २१ देखि २३ सम्म युएईको अल आइनमा आयोजित पाटा एडभेन्चर ट्राभल एण्ड रिस्पोन्सिबल टुरिज्म मार्टमा ३३ वटा मुलुकका १८० जनाको सहभागिता रहेको थियो । सो मार्टमा नेपालबाट पाटा नेपाल च्याप्टर, नेपाल पर्यटन बोर्ड र नेपाल वायुसेवा निगमसहित ११ वटा निजी पर्यटन व्यावसायिक कम्पनीको सहभागिता रहेको थियो ।
संस्कृति तथा पर्यटन विभाग, आबुधाबीका कार्यकारी निर्देशक सुल्तान अल मुतावा अल धहेरीले मार्टको उद्घाटन गगरेका थिए ।
पाटा अन्तर्राष्ट्रियका प्रबन्ध निर्देशक डा मारिओ हार्डीले पाटाले प्रशान्त एसिया क्षेत्रभित्र रहेका सम्पूर्ण सरोकारवाला निकाय तथा व्यक्तिका लागि हितकारी योजना निर्माण, हरेक गन्तव्य वा देशको विशेषता र विविधताको प्रबद्र्धन गर्नुपर्नेमा जोड दिए ।
पाटा नेपाल च्याप्टरका प्रबन्ध निर्देशक सुरेशसिंह बुडालले नेपालमा हरेक प्रकारको साहसिक पर्यटकको तिर्खा मेटाउने स्रोत तथा बस्तुसेवा उपलब्ध भएकोले नेपाललाई साहसिक पर्यटनको गन्तव्यको रुपमा सक्रिय प्रबद्र्धन तथा बजारीकरण गरिनुपर्ने बताए ।
काठमाडौँसँग सातामा ७० भन्दा बढी हवाई उडानले जोडिएको अरेबियन बजार नेपालका लागि उच्चस्तरीय पर्यटक भएको सम्भाव्य स्रोत मार्केट हो । नेपाल अरबी मुलुकमा साहसिक गन्तव्यको रुपमा परिचित छ ।
सन् २०१२ मा राजकुमार बदर बिन खालिद बिन फाहदले सफलतापूर्वक सगरमाथाको आरोहण गरी सातवटै महाद्वीपका उच्च हिमश्रृंखला आरोहण गर्ने पहिलो साउदी अरबी नागरिक बनेका थिए ।
प्रत्येक वर्ष पाँच हजारदेखि छ हजार अरेबियन पर्यटक नेपाल भ्रमणमा आउने गरेका छन् । प्राकृतिक, सांस्कृतिक तथा साहसिक यात्राको बेजोड संयोजनले सजिएको नेपालका अन्नपूर्ण, काठमाडौँ उपत्यका, मुस्ताङ, पोखरा, चितवनलगायत मनमोहक गन्तब्यको उचित बजार अनुसन्धान तथा प्रबद्र्धन भएमा अधिकतम अरेबियन पर्यटकलाई नेपाल घुम्न प्रेरित गर्न सकिन्छ ।रासस
२०७४ फागुन १३ गते प्रकाशित
वि.सं.२०७४ फागुन १३ आइतवार १८:१० मा प्रकाशित
