उदयपुर । जिल्लाको सुनकोशी गाउँपालिकाको नाम ‘लिम्चुङबुङ’ भएको छ । सुनकोशी गाउँपालिकाका जनप्रतिनिधिले आफ्नो गाउँपालिकाको नाम लिम्चुङबुङ होस् भन्दै पाँच महिनाअघि मात्र संघीय मामिला मन्त्रालयमा निवेदन दिएअनुसार हालै नाम परिवर्तनको स्वीकृति भएको सो गाउँपालिकाका अध्यक्ष मेजर कुमार राईले बताए ।
नेपालका धेरै स्थानमा सुनकोशी गाउँपालिका नाम भएका कारण पनि गाउँपालिकाको छुट्टै पहिचान सहितको नाम व्यवस्थापन गरिएको अध्यक्ष राईले बताउए । सो गाउँपालिकाकी उपाध्यक्ष रमिला राईका अनुसार लिम्चुङबुङ भनेको किराँती चामलिङ राई भाषामा सुनतारी फूलको नाम भएको कुरा बताउनु भएको छ ।
सुनतारी फूलहरु स्थानीय क्षेत्रको बाँसबोटे, बराह, जाँते, बलाम्ता र ताम्लिछा क्षेत्रमा व्यापक पाइने एक प्रकारको लोकप्रिय वनस्पति सुनतारी फूलको क्षेत्र भएको कारण सोही फूलको पहिचानका लागि चामलिङ भाषाबाट गाउँपालिकाको नाम लिम्चुङबुङ रािखएको उपाध्यक्ष राईले बताए ।
स्थानीय राई जातिहरुको विवाहमा बाबुमाइती ढोगभेट गर्दा र छोरीचेलीले माइतीलाई ढोगभेट गर्दा उक्त फूल उपहार दिने गरेको र स्थानीय स्तरमा औषधिका लागि पनि सुनतारी फूल प्रयोग गरिने कारण लोकप्रिय भएको र यसैको नामबाट गाउँपालिकाको नाम निर्धारण भएको बलाम्ताका पूर्वगाविस अध्यक्ष वसन्तकुमार राईले बताए ।
आफ्नो गाउँघर किराँती राई, क्षेत्री ब्राह्मणको साझा संगमस्थल भएको र यो क्षेत्रमा सबैतिर फुल्ने र पाइने सुनतारी फूलले यो क्षेत्रको छुट्टै पहिचान र परिचयसमेत दिएको हुँदा लिम्चुङबुङ नामले उदयपुर मात्र नभई नेपालमा नै आफूहरुको गाउँपालिकाको छुट्टै पहिचान गराएको पनि बरालको भनाई छ ।
२०७४ फागुन १७ गते प्रकाशित
वि.सं.२०७४ फागुन १७ बिहीवार ११:०८ मा प्रकाशित
