काडमाडौं । हामी अफिसमा काम गरिरहेका थियौं । एक्कासी आकस्मिक अवस्थामा मात्र बज्ने साइरन बज्यो । के भएको रहेछ भनेर बाहिर निस्केर हेर्दा एउटा विमान हल्लिंदै आयो । अफिसमा भएका सबैजना बाहिर निस्केर हेर्न थाल्यौं ।
सबैतिर चिच्याहट र कोलाहालको अवस्था थियो । रन–वे समात्न नसकी लरबराउँदै आएको विमानबाट छुट्टै आवाज आयो । धुवाँको कालो मुस्लो निस्किन थाल्यो । तत्कालै आगो लागेका कारण विमान भित्र यात्रुहरुको कोलाहाल पूर्ण अवस्था थियो ।
हामी पनि घटनास्थलमा
जान अगाडी बढ्दै थियौं तर, उद्धारमा खटिएका सुरक्षा कर्मी र अग्नि नियन्त्रकले जान अनुमति दिएनन् । त्यतिबेला ज्यादै संवेनशिल अवस्था भएकाले पनि जान मिल्दैनथ्यो । ठाउँठाउँमा आगोका टुक्राहरु उडेर वरपर छरिइरहेको थियो । अग्नि नियन्त्रकले आगो निभाइरहेको थियो । नेपाली सेना, नेपाल प्रहरी, शसस्त्र प्रहरी र विमानस्थल कर्मचारी उद्धारका निम्ति जम्मा भइसकेका थिए ।
आगो नियन्त्रणमा आए लगत्तै जे जस्तो इक्वीप्मेन्ट थियो त्यसैले उद्धार गर्ने काम गरियो । उद्धार गर्ने क्रममा पनि घाइतेहरुको कोलाहाल थियो । संभव भएसम्म घाइतेको तत्कालै उद्धार गरी उपचारका निम्ति एम्बुलेन्समा पठाइयो । च्यापिएका यात्रुलाई निकाल्न सुरक्षाकर्मीहरुले उद्धार सामाग्रीको प्रयोग गरेर उद्धार गरेका थिए ।
बंगलादेशको राजधानी ढाकाबाट आएको विमानमा ७१ जना यात्रु सवार भएको खुल्न आएको छ । दिउँसो २ः१५ बजे अवतरण गर्ने समय थियो । घटना हुँदा करिव २ ः १८ बजेको थियो । करिव साँढे चारबजेसम्म मुख्य उद्धारको काम सकिएपछि फर्किएँ ।
(विमानस्थलमा कार्यरत प्रत्यक्षदर्शी शुभाष सुवेदीसंग कुराकानीमा आधारित)
२०७४ फागुन २८ गते प्रकाशित
वि.सं.२०७४ फागुन २८ सोमवार २१:५८ मा प्रकाशित