काठमाडौं । प्रधानमन्त्री केपी शर्मा ओलीले राष्ट्रिय अखण्डता र सुरक्षामा धावा बोल्ने माथी सरकारले कडा नीति लिने बताउनुभएको छ ।
राष्ट्रिय सुरक्षा परिषदको १७ औं सचिवालय बैठकलाई आज सिंहदरबारमा सम्बोधन गर्दै प्रधानमन्त्री ओलीले सो कुरा बताउनुभएको हो । प्रधानमन्त्री ओलीले कहिले जनताका नाममा ,कहिले जातिका नाममा आतंक मच्चाउनेहरुलाई नछोडिने चेतावनी दिनुभएको छ । प्रधानमन्त्री ओलीले भन्नुभयो “राष्ट्र निर्माणको महाअभियानमा लागेका बेला यसलाई विभिन्न नाममा अवरोध गर्नेहरुप्रति सरकार टुलुटुलु हेरेर बस्दैन ।”
प्रधानमन्त्री ओलीले भन्नुभयो “राष्ट्र अघि बढ्न लागेका बेला बाटोमा बम हान्ने,जनता एकजुट भएका बेला बिखण्डनका कुरा गर्ने,धार्मिक विद्वेश फैलाउनेहरुबाट सजग हुनु पर्छ । ”प्रधानमन्त्री ओलीले नेपाल लोकतान्त्रिक मार्गमा द्रुत गतिमा अघि बढ्ने र देश भौगोलिक रुपमा अखण्ड रहने बताउनुभएको छ । “अब प्रतिगमन र बिखण्डनका कुरा गर्नु दिवा सपना मात्र हो ” प्रधानमन्त्री ओलीले भन्नुभयो “कसैले षडयन्त्रको जगमा आफ्नो दुनो सोझ्याउन खोज्छ भने त्यसलाई ठिक लाउने ठाउँमा हामी छौं ।”
राष्ट्रिय सुरक्षा परिषदले विगतको द्वन्द्व,हिंसा,नाकाबन्दीमा महत्वपूर्ण भूमिका निवार्ह गरेको बताउदै प्रधानमन्त्री ओलीले भन्नुभयो “यो सबै भूमिका नेपालको स्वाभिमानको सुरक्षा हो ।” प्रधानमन्त्री ओलीले नेपाली सेनाले सबै प्रकारका उतारचढाव देख्दै आएको र राष्ट्रहितको पक्षमा उभिएको बताउनुभएको छ । प्रधानमन्त्री ओलीले नेपालीहरु तोपसँग खुकुरीले लडेर जित हासिल गरेको जाती भएको स्मरण गराउनु भएको छ । “राष्ट्रिय सुरक्षा र नेपाली सेनालाई भित्रै देखि बलियो बनाउनु पर्दछ” प्रधानमन्त्री ओलीले भन्नुभयो “भित्र कमजोर पार्ने तर बाहिर बलियो देखाएर मात्र हुदैन ।”
प्रधानमन्त्री ओलीले सरकारले राष्ट्रिय सुरक्षा सम्बन्धि धारणालाई समयअनुकुल ढंगले अघि बढाउने तयारी गरेको बताउनुभएको छ । “विगतमा पनि हामीले गौरव गर्ने हैसियत बनाएकै हौं ” प्रधानमन्त्री ओलीले भन्नुभयो “दासता नस्विकारेका र पराधिन नभएको नेपाल अनन्तसम्म यही हैसियतमा रहनेछ ।”कार्यक्रममा रक्षा मन्त्री इश्वर पोख्रेल,अर्थमन्त्री डा.युवराज खतिवडा प्रधानमन्त्रीका मूख्य सल्लाहकार बिष्णु रिमाल लगायतको उपस्थिती थियो ।
२०७५ बैशाख २४ गते प्रकाशित
वि.सं.२०७५ वैशाख २४ सोमवार १३:३५ मा प्रकाशित
