काठमाडौं। जोशी हाइड्रोपावर डेभलपमेन्ट कम्पनी लिमीटेडले आगामी जेठ ८ गतेदेखि आयोजना प्रभावित क्षेत्रका बासिन्दाका लागि ३ लाख ७१ हजार ४ सय कित्ता साधारणसेयरको आइपीओ निश्कासन गर्ने भएको छ । कम्पनीले आयोजना प्रभावित क्षेत्र इलाम जिल्लाको इलाम नगरपालिका वडानम्बर १, ३ र ४ ९साबिक इलाम जिल्ला साखेजुङ, पुवामजुवा र माइपोखरी गाविसका बासिन्दाहरुका लागि आइपीओ निश्कासन गर्ने भएको हो ।
कम्पनीले छिटोमा जेठ २२ र ढिलोमा असार ११ गतेसम्म निष्काशन गर्ने धितोपत्र निष्काशन तथा बिक्री प्रबन्धक सिद्धार्थ क्यापिटलले जनाएको छ। आइपिओ आवेदनको लागि इलाम जिल्लामा रहेको सिद्धार्थ बैंक, एक्सेल डेभलपमेन्ट बैंक र कन्काइ विकास बैंकमार्फत आवदेन दिन पाइने सिद्धार्थ क्यापिटलले जनाएको छ।
कम्पनीले आफ्नो कुल चुक्तापूँजीको १० प्रतिशतले हुन आउने सेयर आयोजना प्रभावित क्षेत्रका बासिन्दालाई बिक्री गर्न लागेको हो । यसपछि ४९ प्रतिशतले हुन आउने १८ लाख १९ हजार ८ सय ६० कित्ता सेयर सर्वसाधारणलाई बिक्री गर्ने योजना रहेको आह्वानपत्रमा उल्लेख छ । कम्पनीको अधिकृत पूँजी ४५ करोड, जारी पूँजी ३७ करोड १४ लाख र चुक्तापूँजी १८ करोड ९४ लाख रुपैयाँ रहेको छ ।
क्रेडिट रेटिङ एजेन्सी इक्रा नेपालले यसको आइपीओलाई ग्रेड ५ को ग्रेडिङ प्रदान गरेको छ । यसको अर्थ कम्पनीको अवस्था आधारभूत भन्दा निकै कमजोर रहेको छ भन्ने हो । जोशी हाइड्रोपावर कम्पनीले ३ हजार किलोवाट क्षमताको माथिल्लो पुवा १ जलविद्युत आयोजना निर्माण गरिरहेको छ ।
२०७५ बैशााख ३० गते प्रकाशत
वि.सं.२०७५ वैशाख ३० आइतवार ११:१७ मा प्रकाशित