काठमाडौं । रैराङ हाइड्रोपावर डेभलपमेन्ट कम्पनीको आइपीओमा माग भन्दा १८.०७ गुण बढी आवेदन परेको छ । सीडीएस एन्ड क्लियरिङ लिमिटेडका प्रवक्ता सुरेश न्यौपानेका अनुसार लगानीकर्ताले १ करोड ३६ लाख ३८ हजार कित्ताका लागि आवेदन दिएका छन् । कुल १ लाख ७७ हजार ३ सय ५० आवेदकबाट १ अर्ब ३६ करोड ३८ लाख बढीको आवेदन परेको हो । जुन माग भन्दा १८.०७ गुण बढी हो ।
अब आवेदन रुजु गरिनेछ । रुजु गर्दा आवेदक संख्या र रकममा सामान्य तलमाथि हुन सक्ने सीडीएसको भनाई छ । रैराङले कुल ८ लाख ४० हजार कित्ता आइपीओमध्ये ३३ हजार ६०० कित्ता कम्पनीका कर्मचारी र ४२ हजार कित्ता म्युचुअल फन्डलाई छुट्याएर बाँकी रहेको ७ लाख ६४ हजार ४०० कित्ता मात्र सेयर सर्वसाधारणलाई बिक्री गरेको हो ।
कम्पनीले वैशाख ३१ गतेदेखि जेठ ३ गतेसम्म आइपीओ बिक्री खुला गरेको हो । कम्पनीले जारी पुँजी ५६ करोड रुपैयाँको १५ प्रतिशत सेयर निष्कासन गरेको हो । रैराङले यसअघि पाँचथर र ताप्लेजुङ जिल्लाका आयोजना प्रभावित स्थानीयबासीलाई ५ लाख ६० हजार कित्ता आइपीओ बिक्री गरिसकेको छ ।
२०७५ जेठ ४ गते प्रकाशित
वि.सं.२०७५ जेठ ४ शुक्रवार ११:३३ मा प्रकाशित
