काठमाडौं । नेपाल बैंक लिमिटेडले प्रतिशेयर प्रिमियमसहित २८० रुपैयाँमा एफपिओ निष्काशन गर्ने भएको छ । बैंक संचालक समितिले एक सय रुपैयाँ अंकित मूल्यमा १८० रुपैयाँ प्रिमियम थपेर एफपिओ निष्काशन गर्ने प्रस्ताव गरेको हो । यद्दपि, बैंकको यस प्रस्तावलाई नियामक नेपाल धितोपत्र बोर्डले अनुमति दिनुपर्ने हुन्छ । धितोपत्र बोर्डंले कति रुपैयाँमा एफपीओ ल्याउन अनुमति दिन्छ भन्ने चाहिँ टुंगो लागिसकेको छैन ।
बैंकले गत साधारणसभा बाट एक अर्ब ७६ करोड ८४ लाख रुपैयाँ बराबरको एक करोड ७६ लाख ८४ हजार कित्ता एफपिओ निष्काशन गर्ने प्रस्ताव पारित गरेको थियो । बैंकको हालको चुक्ता पूँजी ८ अर्ब ४ करोड रुपैयाँ रहेको छ । एफपिओ निष्काशनपछि बैंकको चुक्ता पूँजी ९ अर्ब ८१ करोड पुग्ने छ। त्यस्तै प्रिमियम रकम जगेडा कोषमा थपिनेछ ।
हाल बैंकमा नेपाल सरकारको ६२.२१ प्रतिशत र सर्वसाधारणको ३७.७९ प्रतिशत शेयर स्वामित्व रहेको छ । एफपिओ निष्काशनपछि बैंकमा सरकारी स्वामित्व ५१ प्रतिशतमा कायम हुनेछ ।
बैंकले चालु आर्थिक वर्षको तेस्रो त्रैमासमा नेपाल बैंकले २ अर्ब ५६ करोड ७७ लाख २८ हजार रुपैयाँ खुद नाफा कमाएको छ। प्रतिसेयर आम्दानी ४२ रुपैयाँ ५७ पैसा रहेको यस बैकको प्रतिसेयर नेटवर्थ १७४ रुपैयाँ ३१ पैसा छ ।
२०७५ जेठ ११ गते प्रकाशित
वि.सं.२०७५ जेठ ११ शुक्रवार १५:११ मा प्रकाशित